E prome ‘Belva Award’ a wordo otorga na artista nobo Kim Violenes

Forma unico pa promove arte y cultura na Aruba

• Premio sosteni pa famia Rasmussen Henriquez 

ORANJESTAD (AAN): E fondo di Cultuurfonds Caribisch Gebied (CCG), hunto cu famia Rasmussen Henriquez, tabata orguyosamente e anfitrion pa e prome ceremonia di entrega di Belva Awards.

   Riba Diadomingo, famia Rasmussen Henriquez hunto cu Cultuurfonds CCG cu e Belva Award aki a rindi homenahe na artistanan contemporaneo destaca cu ta emergi na Aruba.  E Belva Award di e aña aki a wordo otorga na Kim Violenes, reconoci pa su excepcional vision artistico y su contribucionnan na e panorama cultural di e isla.

   Ademas di Belva Award, a otorga un Belva Honorable Mention na Carolyn Geerman, reconociendo pa su calidad excepcional di trabao.  E distincion aki ta wordo entrega den e añamnan unda candidatura ta presenta un solidez general notable y por a wordo duna den futuro añanan ora cu e ta wordo considera mereci.

   Belva Award a wordo crea na honor di Belva Rasmussen Henriquez.  Belva ta original di Aruba.  Su mayornan tabata Sr. Benjamin (Benny) Titus Henriquez, e prome Director General di Caribbean Mercantile Bank (CMB) na Aruba, y señora Henriette (Etty) Adelaida Henriquez.

   Despues di a casa cu Walter Rasmussen, y muda pa Merca, Belva a regresa Aruba na varios ocasion cu su famia, manteniendo su cas y su conexion cu su isla di nacemento, te cu el a fayece na 2024.

  Su pasion di henter bida pa cultura y arte, como tambe su profundo amor pa su isla natal Aruba, a inspira su yiu homber Ben Rasmussen pa crea un fondo pa apoya e artistanan local cu ta cuminza sali mas padilanti.

   “Arte y cultura a hunga un rol importante den bida di mi mama y nos famia, y nan ta un parti fundamental di e patrimonio di Aruba.  Creando un forma sostenibel pa sostene y encurasha e artistanan local pa crece, ta e forma ideal y mas significante pa honra mi mama.  Treciendo hunto algun di e cosnan cu e tabata kere mas aden, “arte y cultura, y duna bek na nos comunidad,” e yiu di Belva, Ben Rasmussen a indica.

   E premio anual aki tin como meta pa anima tur talento nobo pa crece y contribui na e futuro cultural di Aruba, reflehando e legado di Belva cu lo keda dura bay dilanti.