Proyectonan crea sin estudio di visibilidad cu ley ta exigi --- *Voz di expertonan a wordo silencia den destruccion di bienestar --- *”Nos lo paga e debe orguyosamente” ta contra base legal di Aruba
ORANJESTAD (AAN) — E problemanan sindical cu Aruba a conoce durante ultimo lunanan di 2021 y a continua na entrada di 2022, sigur a habri porta pa berdadnan cu durante demasiado tempo a keda scondi na Aruba.
Democracia a wordo silencia den un situacion sumamente peligroso cu a permiti mentira cualifica politiconan cu Pueblo a paga pa goberna e pais.
Awe porfin ta bira necesario pa cifranan wordo entrega na Pueblo na un forma cu ciudadanonan por comprende kico a pasa cu Aruba durante e epoca 2009 y 2022.
For di 2018, DIARIO a base di rapportnan y documentonan di expertonan cu a wordo silencia, a saca Aruba for di e mundo di ilusion y fantasia, cu Mike Eman a uza pa hiba un maneho marca pa falsedad.
Ta increibel cu awe ainda e homber cu a destrui Aruba, tin e curashi pa pretende cu mester keda central despues cu su supuesto “curazon di oro” a destrui Aruba.
Na 2009 un temporada politico macabre a habri pa Aruba y a destrui e principionan di democracia cu no conoce supuesto “curazon di oro” pero gobernantenan cu no ta subi mientras e pais ta zink, manera a pasa cu Aruba durante reinado di Mike Eman.
Porfin Aruba tin un Gobierno cu no ta expone plannan yena cu ilusion, pero ta presenta cifranan cu ta splica Aruba kico a pasa cu su placa y pakico awe Aruba ta den e problema serio cu e conoce.
For di 2009, Aruba ta victima di e fenomeno Mike Eman, cu a uza e pais como su plataforma pa e briya den exterior cu placa di Pueblo.
E debe enorme di Aruba a nace den e creacion di e curazon di oro di Mike Eman, cu Pueblo mester a carga riba schouder y mester a haya aplauso mundial, mientras Aruba tabata zink.
Con el a ciega y manipula Aruba ta wordo describi den e momento cu Pueblo a bay defende Mike Eman den su drama di welga di hamber ora Hulanda y Reino a sali na defensa di bienestar di Aruba y a cuminsa pone un fin na e comedia cu Mike Eman a hunga cu Pueblo di Aruba.
Ora mira gastonan cu Aruba a haci pa popularidad di Mike Eman, e homber cu a lansa su mes como “curazon di oro” pa e zink Aruba, Aruba lo haya e prueba di e engaño politico mas grandi den historia di Aruba.
Receptie, publicacion, eventonan, biahenan, gastonan enorme riba lomba di e Pueblo di Aruba, cu Mike Eman a manipula.
Como hurista Mike Eman mester tabata sa, cu ley no ta permiti un gobernante crea un debe cu a hinca Aruba den estado di bancarota, cu e promesa cu “orguyosamente lo paga e debe”.
Awe cifranan ta papia un idioma cla y ta indica con Mike Eman a kibra Ley den e forma cu el a atende cu placa di Pueblo di Aruba.
Husticia ta haci su mes!
Generacionnan den futuro lo lanta para contra e produccion gubernamental di Mike Eman, cu a dirigi Aruba sin estudio di resultadonan di e decisionnan cu e tabata tuma y proyectonan cu el a introduci.
Ni su plan pa deshaci di BBO, ni e plan pa gasta 1.6 Biyon, ni gastonan cu a haci cu e refineria, ni su maneho total tabata basa riba estudio necesario y sigur di visibilidad financiero cu ley ta exigi.
Un epoca ta cera. Un epoca cu a bira desastroso pa Aruba, cu a cay den e trampa di “curazon di oro” di Mike Eman, cu a uza Pueblo di Aruba como trampolin pa creacion di un identidad politico falso, den cual e mester a briya como salbador di Aruba mientras Aruba y futuro di Aruba a wordo destrui manera cifranan ta duna prueba.
