Analisis di un presentacion historico di situacion financiero Aruba --- *Un deficit di casi 300 Miyon cu mester e inversionnan planea --- *Mester mantene transparencia actual den maneho financiero Aruba
ORANJESTAD (AAN) — Durante e dianan cu a pasa, Aruba a conoce un desaroyo sumamente importante.
Leynan cu ta dicidi pa gobernacion di Aruba, ta exigi pa e maneho cu Gobierno ta hiba ta comprendibel pa Pueblo.
E exigencia pa placa di Pueblo wordo atende cu aprobacion di Pueblo, tin sosten directo den e Ley di Budget di Parlamento cu ta encarga cu e control riba maneho financiero di Gobierno cu mester ta di acuerdo cu cifranan cu Parlamento aproba.
Reunionnan di Parlamento di Aruba pa trata cifranan di Aruba, historicamente tabata dura dianan largo den cual e tono politico mayoria di bez tabata domina.
Awe un desaroyo sumamente importante pa democracia ta wordo registra y hasta ta culmina cu e forma cu e Ministro di Asuntonan Financiero di Aruba y Prome Ministro di Aruba ta splica Aruba tur detaye di loke lo pasa cu placa di Aruba.
Manera DIARIO a anuncia, tur e informacionnan aki lo sirbi pa nos duna Aruba tur splicacion riba desaroyo financiero di e pais, cu directamente lo mishi cu Pueblo di Aruba, cu mester percura pa entrada pa Aruba.
E informacionnan cu a wordo duna dor di Gobierno di Aruba e siman aki, ta historico pa e pais cu for di 2018 ta traha riba su recuperacion financiero.
Ora papia di recuperacion financiero na prome lugar ta papia di e forma responsabel cu lo atende cu placa di Aruba.
Pa saca e balansa di Aruba for di negativo y hiba positivo, na 2018 Aruba a tuma medidanan cu yudansa y supervision di Reino.
E situacion financiero di Aruba, ora Hulanda a drenta na 2014, tabata caotico manera rapport di tur instancia internacional entre cual IMF, a splica e tempo.
Na 2018 concretamente a cuminsa cu medidanan cu mester a saca Aruba for di e situacion di bancarota cu e pais tabata aden.
Na 2020, pa prome bez gobierno di Aruba tabata prepara pa entrega cifranan responsabel di e pais den e presupuesto original pa 2020, cu Covid-19 a basha abou.
Awe ora nos papia di situacion financiero di Aruba, nos ta papia di situacion financiero di un pais cu na 2020 a keda sin entrada, ora e mester a cera su portanan den lockdown y economia a wordo practicamente completamente tranca.
Pasonan cu a wordo tuma, manera sosten financierto na companianan local, despues di lockdown a yuda Aruba recupera manera awe e cifranan di Aruba ta indica.
Nos ta papia di un momento historico, pasobra e cifranan cu Gobierno a presenta pa 2022, ta e base financiero di Aruba cu mester encamina e proceso pa yega na un futuro economico y financiero nobo, den cual uno di e tareanan grandi lo ta, pa cubri e debenan tambe cu Aruba tin.
E prome bista importante tabata e posicion financiero di Aruba na e momentonan aki.
Aruba mester di practicamente 300 pa pone su entrada y gastonan den balansa. Esaki ta nifica cu e suma cu mester financia, cu pues ta bira debe di e pais, lo aumenta.
Un debe ta nifica un suma cu mester paga pero tambe interes cu mester wordo paga riba e debe.
E cifranan di 2022 ta indica cu Aruba a alcansa un momento historico.
Gabinete Evelyn Wever-Croes 2 a duna prueba cu e ta respeta e hecho cu democracia ta exigi pa Aruba ta bon informa riba tereno financiero pa asina Pueblo sa kico ta pasa detayadamente cu su placa.
DIARIO lo cumpli cu su deber periodistico den e informacion di Pueblo, cu mester comprende y prepara su mes pa e realidad financiero di Aruba cu na e momentonan aki 1014 Miyon cu mester haya financiamento di Aruba, cu sigur mester di e programa di inversion di companianan y mas entrada pa e Pueblo di Aruba manera Gobierno Wever-Croes a anuncia pa 2022.
Mas entrada di belasting produci pa actividad economico pa pone situacion financiero di Aruba den balansa y habri un epoca social di recuperacion.
