John Hart, Parlamentario fraccion AVP:
- Pero esun cu mester trece solucion ta e Minister
ORANJESTAD (AAN)- Recien DIARIO a acerca Parlamentario John Hart, di Fraccion di AVP, tocante e tema di material di siguridad cu KPA ta rekeri di dje, entre otro, ballet proof vest, pero cu tin hopi tardanza pa KPA haya esaki, y unda ta cuestiona directamente Parlamento y tambe e Comision, cu 17 luna pasa a haya un carta di SPA, pero no a contesta te ainda.
Hart a señala cu e preocupacion pa e falta di e material di siguridad aki, y e tardanza cu tin, ta na su lugar.
“Mi no por kita afo cu Parlamento tin un rol y esaki ta tuma lugar ora cu nos ta yama e minister bin aden, etc. Pero esun cu ta comprometi ta e Minister y no Parlamento. Den e caso aki e Minister pa ehecucion. Ora cu nos haci un reunion atrobe, of yama un reunion pa nos haci preguntanan, y e minister mester indica cu no tin placa, etc., Parlamento tin cu interveni, pero aworaki Minister ta esun cu tin cu percura cu e solucion tuma lugar” e parlamentario a indica.
El a agrega cu aworaki nan tin un plan traha pa reunionnan cu Minister, y e ora ey lo trata e tema, mescos cu den reunionnan cu el atende caba manera unda nan a papia di DIMAS, entre otro, y e preguntanan a wordo haci den Comision.
“Y segun mi, den un reunion publico tambe nan a wordo haci door di un of dos colega miembro di Parlamento. Dus, e tema ta haya su atencion; solamente cu e preocupacion ta trek, y e siguiente pregunta ta bon pa hacie na Minister ora cu haya chens y di nos banda nos ta bay hacie tambe den Comision, y manera e recess caba nos tin cu continua cu reunionnan, na e momento eynan mi ta kere cu un reunion publico lo por ta pendiente tambe riba algun tema, nos lo hinca esaki tambe aden”, Parlamentario John Hart a señala.
