Segun Randall van Trigt
ORANJESTAD (AAN)- Tocante e hecho cu na Aruba (lesa AZV) no ta reconoce adiccion como un problema di salud mental, den entrevista cu DIARIO, Randall van Trigt, director financiero di Stichting Hunto, a contesta e pregunta pakico si na Corsou ta considera adiccion como un problema di salud, y e seguro di malesa ta cubri gasto al respecto, na Aruba esey no ta e caso, pakico AZV no por regla e parti aki pa cubri gastonan di salud mental?
Van Trigt a confirma cu Curacao a reconoce adiccion como problema di salud mental y e seguro nacional di e pais ta cubri esaki. “Pero Aruba no ta den e fase aki, y esey ta un debate cu tin, pero loke mi a scucha di hendenan halto ta, pa bay busca un abogado.
Kico nan kiermen cu esey? Bay cambia e ley! Nan kier mi cambia e ley, prome cu mi cuminza debati e discusion pa pone nos seguro nacional cubri gastonan di adiccion. Esey ta un di e problemanan mas grandi cu nos tin. Nos mester cuminza reconoce; Curacao ta reconoce caba y full Europa, henter Merca y Latinoamerica tambe ta reconoce”, Randall van Trigt a remarca.
El a expresa tambe cu ora cu HUNTO a bin y a combina adiccion cu Salud Mental bao mesun dak, por wak cu e tratamento ta bayendo hopi miho. “Nos tin mas cu mil persona cu ta wordo yuda na Dakota so. Entre nan, 300 mucha. “Nos ta, na un manera holistic ta takel adiccion y esey ta bao un dak”, van Trigt a señala.
