Minister Endy Croes:
ORANJESTAD (AAN): Durante un conferencia di prensa di Coordinatie Centrum Mensenhandel Mensensmokkel Aruba teni na BRA (Bureau Rampenbestrijding Aruba), Minister di Enseñansa y Deporte, Endy Croes a referi na e campaña cu a wordo lansa cual ta un campaña sosteni pa Ministerio di Enseñansa y sigur Ministerio di Husticia.
Croes a sigui bisa cu esaki ta hopi importante pa e conscientisacion no solamente pa e alumno, pero tambe pa e mayornan y e docentenan.
Hunto mester combati cualkier tipo di trampa unda e hobennan por cay awendia. E peliger tey y kisas no ta mir'e asina facil, pero ora di profundisa den e tema por mira cu e plataformanan social tin nan parti bon, pero nan ta wordo uza pa cosnan menos bon of malo, a remarca.
Pesey e conscientisacion mester ta tur caminda y sigur na scol pero tambe den mundo di deporte cu tambe tin di haber cu un grupo grandi di deportistanan. E ta kere cu riba tur dos tereno hunto mester yuda pa combati traficacion di hende.
Riba nivel di gobierno lo percura pa duna sosten tur caminda cu por pa cu esaki, a remarca.
