ORANJESTAD(AAN)—Si awe DIARIO sigur ta mira espacio pa Aruba recupera riba tereno economico y financiero, ta pa motibo cu Gobierno Wever-Croes a tuma e pasonan cu tur gobierno
democratico na mundo a tuma, pa evita cantidad di morto pero tambe un desastre den cuido medico pa decadanan cu ta bini.
Sigur hendenan cu ta yama nan mes experto den cuido medico, mester evita cu nan ta deshaci di e imagen limpi cu hende cu ta brinda cuido medico durante pandemia, mester presenta na un comunidad cu problema serio mescos cu henter mundo.
Pa cuminsa e naturalesa di Covid-19, e forma cu el a presenta, plama y cambio continuamente, a haci dificil pa cientificonan por a atende cu e malesa.
Mester gradici Cielo cu a haya un vacuna, cu Gobierno di Aruba, den corto tempo a logra entrega Pueblo como arma.
For di 2020 Aruba no tabata tin mester di politico cu ta sconde nan sabiduria pa bin haya voto cu palabranan politico barata manera “rescate” cu ta un palabra cu por a wordo uza na 2018 ora mester a rescata Aruba for di e poz cu Mike Eman a pusha Aruba aden prome cu el a bay drumi bou di cashi cu aprobacion di su partido.
Covid-19, manera tur experto ta bon na haltura, ta bay bira un peso pa Salud Publico, cu mester bay atende awor cu cantidad di malesa pa cual mundo medico no tabata prepara.
A cuminsa cu produccion di aparatonan pa yuda hende hala rosea cu pulmonnan, e organonan vital di curpa humano cu a bira e centro di atake di Covid-19 cu a sigui causa problema.
Ningun hende por acusa Gobierno Wever-Croes cu e no tabata sa loke cientificonan medico di clase mas halto cu por tin, tampoco tabata sabi y te awe no ta na haltura.
Ta como e casonan di Covid-19 tabata presenta, mundo cientifico a realisa cu cerebro humano ta wordo afecta no solamente cu depresion por ehempel pero cu resultado fisico di e malesa.
Awe AZV mester prepara pa un temporada cu e mester bay pone placa riba mesa pa cuido di un pueblo, cu na mes momento lo tin gasto mas grandi den bida diario.
Gasto di coriente lo subi pa personanan cu pulmonnan cu no ta soporta calor mas.
Gastonan di bida ta bay subi y AZV mester prepara pa aumento di su gastonan, despues cu gobierno Henny Eman a introduci AZV como seguro medico exclusivo di Aruba.
E pais riba su mes ta bay tin necesidad di entrada directo di companianan nobo pero tambe di entrada di parti di pagadonan di belasting cu tambe ta forma e base di entrada di AZV cu nan contribucion na AZV.
Den e luz aki DIARIO ta mira e introduccion di proyectonan manera Eagle y Quanten, pero tambe prolongacion di un Gobierno cu tabata sa di tene comercio di Aruba na bida cu ayudo directo y sigura cu placa a sigui circula cu alivio di belasting cu companianan chikito y mediano ta paga.
Ta den e cuadro cu maneho total cu no ta permit aventura y cu DIARIO a vigila tan di acerca, DIARIO ta pone loke otro partidonan ta trece dilanti.
Citgo a duna prueba di e facilidad pa hinca un pais den aventura mescos cu e rapport di Bo Aruba ta splica pa loke ta trata e uzo di placa di pueblo dor di AVP pa cria proyecto.
Aruba no tin espacio mas pa e weganan politico aki y DIARIO lo analisa con cada partido lo duna continuidad na e recuperacion cu Gobierno Wever-Croes a brinda y sigur ta start cu e acuerdo cu a alcansa cu Hulanda, cu mescos cu IMF a confirma cu Wever-Croes a hiba un bon gobernacion cu cualkier coalicion mester sigura.
