ROTTERDAM: Durante diferente control door di autoridad di Douane na waf di Rotterdam, den ultimo 7 dianan aki a logra di intercepta masha hopi cocaina mes scondi.
Ta trata aki di como 2.773 kilo di droga, cu un balor riba caya di riba 207 miyon Euro. Ademas di esaki, nan a detene siete persona, y ya caba 2 sospechoso a wordo hiba dilanti Huez Comisario y nan lo keda deteni pa mas hopi tempo.
AWACATI: E prome cargamento a ser haya Diaranson dos siman pasa, dia 28 di April, durante un control. Como 48 kilo di droga tabata scondi den e portanan di un container cu tabata yena cu awacati for di Colombia.
Den e anochi di 30 di April pa 1 di Mei, tabatin 3 persona no-autoriza riab waf, y parce cu nan a subi tereno pa asina saca e droga for di e containernan. Polis di Waf a detene nan, y despues di interogacion a ser laga liber.
Un dia despues, esta 2 di Mei, Douaneronan a descubri 2 tas deportivo riba tereno di waf conteniendo 35 kilo di cocaina. Un tiki mas leu a mira un hende sospechoso, y nan a detene. Ora cu a check, a resulta cu e persona aki di 18 aña procedente di Rotterdam a bay busca pa saca droga. E persona aki si ta deteni y encarcela.
CAHA BAO DI BARCO: Dialuna 3 di Mei, Douane a descubri den fondo di un container, un bulto cu 32 kilo di cocaina. E container mes tabata yena cu bacoba procedente di Republica Dominicana.
Un dia despues, Diamars 4 di Mei, trahadornan di e team di scuba, durante un control den waf di Vlissingen, un caha wanta na un barco di carga. Den e caha nan a bin haya 50 kilo di cocaina.
RIBA 2 MIL KILO: E mesun Diamars ey, Douane a bin haya hopi cocaina na Waf di Rotterdam. Den un container yena cu auto bieu y motor for di Merca, nan a bin haya 1.470 kilo di droga. Tambe a haya un otro container sospechoso cu a wordo busca pa un chauffeur. Den e container yena cu articulo di computer for di Malaysia, a bin haya 570 kilo di cocaina. E droganan aki tabatin casi mesun identificacion. Kizas hendenan a trata di intercambia e cocaina for di container.
E chauffeur di 52 aña procedente di Ermelo a wordo deteni riba sospecho di ta envolvi den narcotrafico, y el a keda encarcela pendiente mas investigacion. Tambe rond di e container a detene 5 persona como cu ta parce cu nan kier a saca e cocaina for di Waf.
PAMPUNA TAMBE: Riba Diaranson 5 di Mei, a haya dos cargamento chikito di droga. Tabatin 13 kilo di cocaina mey-mey di pisca importa for di Colombia. Tambe 5 kilo di cocaina procedente di Suriname y scondi mey-mey di cantidad di regalo. E balor riba caya di e droga aki ta como 1.3 miyon Euro.
Den un container yena cu pampuna procedente di Brasil, Douane a logra intercepta un cargamento di 550 kilo di cocaina. E droga tabata djis poni bunita asina riba dos pallet den e container.
