Awe Covid-19 ta expone realidad cu DIARIO a defende pa scapa bida - *4.5 Miyon morto a cay den e guera mundial di Covid-19 contra humanidad - *Creacion di panico contra vacuna a bira un arma contra lucha pa bida
ORANJESTAD (AAN) — Cifranan ta entrega prueba di e efectividad cu e vacuna contra Covid-19 tin den e lucha contra e coronavirus nobo, cu a bira un enemigo cruel di hende.
Bienestar total di hende ta wordo afecta dor di un malesa cu ta haya yudansa di amateurnan cu ta wordo permiti pa hunga cu salud di hende.
Na varios occasion DIARIO, prome cu Covid-19 a bati na porta, a mustra riba e peliger grandi cu ta wordo crea na mundo dor di amateurnan cu ta presenta nan mes como conocedor di mundo medico, cu no conoce e proteccion cu ley mester duna na un profesion tan determinante den bida di hende.
Cifranan cu nos ta compila riba tereno mundial y local, ta duna prueba cu hende ta perde e careda contra Covid-19, no pa motibo di un vacuna cu ta mata hende ni cu ta transforma hende den crocodil, pero pa motibo cu leynan ta permiti tur hende hunga dokter y crea peliger mortal pa otro hende.
Cifranan disponibel ta demostra cu e vacuna contra Covid-19 a scapa bida di hende y ta increibel cu ainda tin hende ta wordo permiti pa publicamente duna informacion falso y sin ningun base cu ta causa morto di otro persona.
Esaki ta e realidad di loke ta pasa actualmente den un situacion cu nunca por spera den un mundo cu ta yama su mes avansa y ta permiti pa amateurnan presenta informacionnan sin ningun base, cu ta stroba hende busca nan bida y salud y ta destrui un comunidad.
Personanan cu nunca a sigui e estudio pa medico awe por presenta nan mes como experto riba tereno medico den un situacion cu cada minuut cu hende no vacuna e ta pone no solamente su mes pero cantidad di otro persona na riesgo.
Un persona cu nenga di vacuna ta un persona cu ta dicidi pa su mes pero tambe ta dicidi pa bida of morto di otro persona mientras un variante mas peligroso di Covid-19 ta haya oportunidad di desaroya pa e simpel hecho cu ainda demasiado hende a keda sin vacuna.
Ora mira e resultadonan di Covid-19 por papia aki di un enfermedad pio cu Hitler, cu ta mata sin tene piedad.
Ya 4.5 Miyon hende mundialmente a perde nan bida, mientras Miyones y Miyones di persona ta keda pa semper pashent di un enfermedad.
Mester considera Covid-19 un destructor mas grandi cu Guera Mundial, durante cual tur hende no tabata wordo permiti pa traiciona e bienestar di otro hende y entrega nan na enemigo.
Mescos cu paisnan no por a confronta personanan manera Hitler cu un pistola di awa, awe no por permiti cu personanan cu no sa nada di mundo medico ta stroba hende di scapa di un enfermedad mortal.
Cifranan ta mustra cu Covid-19 ta haya oportunidad di avansa na prome lugar na luganan caminda hendenan no kier vacuna.
Awe nos mester lanta para contra e posibilidad cu hende cu no sa kico nan ta papia, cu nunca a studia pa ta dokter ni pa boticario, cu ta estudionan sumamente pisa, ta presenta nan mes como conocedor di materia medico y ta ocasiona peliger di morto pa hende inocente.
Ora analisa loke ta pasa, mester conclui cu democracia hamas por encera cu libertad di expresion por bira yudansa na un enemigo di hende cu Covid-19 ta!
Democracia no ta permiti cu bida di hende ta wordo pone na peligro cu informacionnan cu stroba hende di defende su mes contra morto!
