E necesidad urgente pa mas concientizacion pa stop bullying

Señora Dalgis Montalvo di Stichting Hunto:

ORANJESTAD  (AAN) Durante e conferencia “Breaking the Silence – Let’s Stop Bullying”, organisa diamars ultimo pa Stichting Hunto, profesionalnan a trata e topico importante di bullying. Bullying ta un comportamiento repetitivo di maltrato, caminda un persona ta haci daño, ter, of intimida un otro, cu e meta pa controla of humiya e victima. Esaki por tuma luga na scol, trabou of online, y e victima por sufri tristesa, ansiedad, miedo, y problema emocional y social grandi.

   Segun Señora Dalgis Montalvo, Directora di Stichting Hunto, den un entrevista cu DIARIO, a bisa cu e motibo pa scoge e topico di bullying ta basa riba e resultadonan di un investigacion reciente cu Stichting Hunto a haci pa colecta data entre hobennan. E investigacion aki a mustra cu tin un necesidad urgente pa mas conscientisacion den e sector di enseñansa, e area social, y tambe entre mayornan y muchanan.

   Señora Montalvo a declara cu Stichting Hunto ta trahando fuerte riba e parti preventivo, pasobra ta ricibi hopi peticion – hasta for di kleuterschoolnan – cu ta pidi yudansa pa guia muchanan den maneho di nan emocionnan y otro problematica cu nan por tin. Segun Montalvo, ta importante pa cuminsa conscientisa for di un edad chikito, pa medio di conferencianan, bishitanan na scolnan y otro actividadnan educativo.

   E directora a sigui bisa cu tin un falta grandi di profesionalnan, mientras cu e demanda y e problematica ta sigui crece. Hopi biaha nan mes mester bisti diferente pechi pa por acapara tur peticion, tanto den e area preventivo como den seccionnan individual, manera charlanan, presentacion y bishitanan na scol.

   Señora Montalvo a enfatisa cu e grupo di edad di mas preocupacion ta entre 6 y 20 aña, un indicacion cla di e necesidad urgente pa trece mas concientisacion riba e tema. E a insisti tambe cu ta importante pa mayornan informa e docter di cas ora nan yiu ta bou di tratalmento of si mester busca ayudo. Stichting Hunto ta keda semper habri pa scucha y duna sosten na tur mucha cu ta pasa den pregunta of yudansa.