Na momento di crisis mundial e realidad di AZV ta presenta
*Inflacion ya a bira un circulo vicioso den necesidad medico
*Prijs di remedi, aparato y servicio ta permiti solo show di SVb?
ORANJESTAD (AAN) — Kico politica por haci cu Pueblo a bira evidente ora AZV a wordo introduci na Aruba den un situacion caotico total.
DIARIO tabata na na careda pa por a yuda informa Pueblo di Aruba kico lo pasa y kico mester pasa pa AZV por a wordo introduci como un accion completamente politico.
Cu nos ta papia berdad y nada mas cu berdad, ta wordo confirma dor di e hecho cu ningun momento AZV tabata un proyecto cu a nace den AVP. E tabata un proyecto cu a nace den seno di MEP, pero MEP no a ehecuta e ley mientras no tabata tin seguridad cu e lo sirbi bienestar di Pueblo.
Rapportnan di e tempo tabata duna tur motibo pa reserva politico y general enfrente AZV cu a uni tur gasto den un pot pa cual Gobierno finalmente ta responsabel pero ta exigi tur ciudadano pago.
Tur otro seguro medico a wordo geschrap cu resultado funesto pa hopi compania y personal sumamente cualifica cu mester a traha den e sector economico aki.
Pueblo di Aruba a wordo mara na AZV, cu AVP mes no por a maneha y cu pronto a bira necesario pa a introduci hasta un entrada extra pa AZV den forma di un BBO special.
Den Reino ningun pais conoce un sistema tan abstracto manera AZV cu ta obliga e ciudadano di ta miembro di AZV, cu mester subi gastonan cu ta subi y sigui subi.
Informacionnan di DIARIO ta cu e situacion ta serio na plataforma mundial pasobra prijsnan lo sigui subi.
Kico lo pasa cu remedi na Aruba? Ta mas cu claro cu AZV mester busca forma pa por sigui duna tur e servicionan medico di e pais.
Pero mas y mas DIARIO ta tende di ciudadanonan cu no por paga nan remedi pasobra placa no ta yega pa loke AZV no ta cubri.
AZV mester paga companianan internacional di remedi y transportacion di remedi.
Semper DIARIO a opone e forma cu pa motibonan politico Gobierno di AVP a introduci un AZV, cu no tabata cla y no tabata tin e forsa di conocemento necesario pa por a start un proyecto di tal magnitud.
Hunto cu expertonan DIARIO tambe ta sumamente preocupa cu e realidad na momento cu prijsnan ta sigui subi den un mundo cu ta papia di recesion y na un Aruba cu no por dicidi pa otro compania di seguro pasobra ley ta obliga tur hende pa ta miembro di AZV.
Pakico un seguro cu no ta di estado por ta mas barata? Pasobra seguronan di companianan di sector priva tabata mara na cadena internacional di seguro, loke tabata haci cu nan poder financiero tabata mas grandi ya cu nan cantidad di cliente y di entrada tin mucho mas forsa cu loke e cantidad limita di ciudadano Arubano den AZV por produci.
DIARIO hunto cu Aruba ta expresa preocupacion pa AZV mientras 2023 ta spera cu un recesio, cu aumento di prijsnan cu sigur lo afecta AZV cu ya lo mester duna asistencia na mas hende cu no por traha debi na nan edad cu ta exigi mas cuido entre otro.
Por conclui cu e votonan pa haya poder politico, tabata mas importante cu e resultado na Pueblo ora a exigi Pueblo drenta AZV sin escogencia manera democracia ta exigi!
