ORANJESTAD (AAN): Algun siman pasa, DIARIO a publica relaciona cu e plan cu Departamento di Impuesto tin pa yuda comunidad haci pago na un forma mas suave pa Impuesto di Motor di 2023.
For di fin di September caba, automobilistanan por cuminza paga parcialmente nan Nummerplaat di 2023 cerca DIMP via sistema online. Esaki ta un paso importante, unda ta habri e posibilidad di pago mucho mas trempan compara cu December.
Awor cu DIMP tin e sistema di pago parcial cu ta brinda e automobilista mas espacio financiero pa nan completa e pago di impuesto na tempo, pues no mas laat cu 31 di Januari 2023.
Ya tin hopi hende cu na fin di September a haci pago parcial. Awe 31 di October ta ultimo dia di October, pues corda pa bo haci awe tambe un pago parcial. Fin di November y December ta mescos.
DIARIO a compronde cu hopi ciudadano ta haciendo uso di e sistema di ‘paga poco-poco’ pa bo keda cla cu pago di Nummerplaat na tempo, y adelanta! Pasobra corda bon, cu bo Nummerplaat bo no por pag’e despues di e deadline. Pasobra bo ta haya extra boet y gasto innecesario e ora ey.
DIMP a habri espacio pa tur hende paga poco-poco desde fin di September, te cu fin di Januari 2023 pa haci e pago. Cada automobilista ta haya mas tempo, pa nan cuminza paga riba nan impuesto, y cu e meta pa ora e deadline yega, ya e no mester di stress mas, ni para den rij, ni haya boet.
Kiermeen awor e chens pa paga Nummerplaat poco-poco, por ehemplo pagando 50 Florin awor na fin di September, fin di October, fin di November, etc., e automobilista lo tin pa Januari 2023 sigur e prome mitar di aña paga. (Cada categoria tin un diferente minimum, pues si bo tin un nummerplaat cu nomber ‘personaliza’, e minimum pa luna ta 200 Florin).
Esaki sigur ta un situacion ‘win-win’ pa esnan cu ta paga mucho mas hopi pa nan nummerplaat, e.o. esnan cu tin Bus grandi, vehiculo Diesel, y companianan cu tin mas cu un auto... lo sali beneficia pagando poco-poco cu e sistema aki.
E sistema di pago parcial ta un beneficio cu DIMP ta duna tur automobilista pa nan por cumpli cu nan Impuesto na tempo. Djis tene cuenta cu e pago minimo mensual cu ta exigi: Pa A-nummer ta 50 Florin. Pa MFA-nummer ta 50 Florin. Pa Autobus chikito ta 50 Florin. Autobus grandi ta 200 Florin pa luna. Truck di Diesel ta minimo 200 Florin pa luna.
DIMP ta pidi esnan cu ta haci pago Online via e app di nan banco, pa por fabor haci uso di e sistema di ‘Bill Payments’, y evita di usa pago via Transfer. Pasobra Bill Payments ta uno cu ta integra facilmente pa DIMP procesa e pago.
Percura tambe pa bo inclui bo Persoonsnummer, e number di plachi (incluyendo si ta A, MFA, DT, etc) y e number di plachi, y tambe e periodo di pago, pues aki bo ta hinca e aña pa cual bo ta pagando, esta ‘2023’. No ta necesario hinca si ta 1er aña of full aña. Djis pone ‘2023’.
Corda cu e persoonsnummer mester cuadra cu esun registra na DIMP cu e plachi di number! Un cliente cu ta haci pago pa plachi number di su mama, tin di corda pone e persoonsnummer di e mama ora di haci e pago ey.
DIMP lo acepta e pago di 2023 solamente si bo impuesto di 2022 ta completamente paga. Pa 2023 tambe, lo keda usa e mesun plachinan cora cu blanco di aña 2020. E decision ey ta debi cu e ta yuda baha gasto di Gobierno.
