Edwin Roos, vocero di SOGA:
ORANJESTAD (AAN) – Edwin Roos, vocero y tesorero di SOGA (Stichting Onroerend Goed Aruba), contestando un pregunta di prensa a revela cual ta e motibo principal cu SOGA y OHLA a parti foi otro.
“E motibo principal ta cu nos tin menos cu 10% di e proyecto, pa finaliza. Y, si nos mantene e contratista aki, den nos opinion, e gastonan adicional di overhead (costonan di maneho, specialista) cu nan tin akinan, no ta bal la pena compara cu e trabao completo, total na balor di florin cu mester wordo paga ainda, si nan keda e ultimo aña aki cu falta di trabao, aproximadamente, na nos opinion no tabata beneficioso”, Roos a relata.
El a indica cu SOGA a duna nan un proposicion financiero y a enfatiza cu e desacuerdo tin nada di haber cu e parti tecnico di e proyecto sino cu e ta di indole financiero.
“Nos no ta di acuerdo cu e prijs cu nos mester a paga si nan lo a keda”, señor Roos a reitera.
El a sigui splica cu e trabao aki a cuminza na 2014 y mester a caba na 2018. Den trabao di construccion por haci un presupuesto y ta haci un trabao extra y ta planea y pone prijs separa. “Pesey tambe bo ta haya cu e fecha di entrega ta hala y bo mester di mas trabao y mas tempo. Pues, esey ta loke a pasa na varios ocasion”, Edwin Roos a menciona.
El a wak den media tambe bisa “nan a lubida e sala di operacion. Roos a reacciona: “E no ta asina! E proyecto aki ta basa riba un plan di exigencia cu a bin di Hospital. Cu Hospital su experto a traha. E tempo ey, e sala di operacion cu nan tabata tin nan tabata satisfecho cune. Nan di, no e no mester ta aden. E ICU ta otro. E di, e no ta necesario; pues nos a cuminza e proyecto sin e dos componentenan ey”, Roos a duna di conoce.
