E motibo di con un avion a keda draai rond pa 32 minuut riba Aruba

Bierna Santo mainta...

 *Vuelo a yega Aruba pero ainda Aeropuerto no a habri 

ORANJESTAD (AAN): Siman pasa Diabierna hopi hende cu a lanta trempan, specialmente den areanan noordoost di Aruba, y tambe central di e isla, tabata mira un avion bulando constantemente riba e isla ta haci birada.

   A resulta cu un vuelo cu a yega demasiado trempan na Aruba, a bin haya sa cu nan no por ateriza.  Y pesey nan a wordo poni riba un ‘holding pattern’ riba e isla.

   Vuelo mucho trempan: Riba Diabierna 18 di April 2025, vuelo di Surinam Airways, esta SLM-631 cu ta un Boeing 737-800 cu matricula PZ-TCX a lanta mas trempan for di Aeropuerto na Paramaribo.  Envez di e horario regular di 7:00 am, el a lanta 2 ora mas trempan, pues pa exactamente 5:02 am el a subi.  Vuelo di Paramaribo pa Aruba normalmente ta dura 2 ora y 25 minuut.  Pero e biaha aki e vuelo a dura como 3 ora y pico, y esey pa e siguiente motibo.

   E vuelo a subi di Johan Adolf Pengel International, cu ta na Zaanderij cerca di Paramaribo, y rapidamente a yega na su altitud pidi di 36.000 pia y a tuma un direccion Noordwest rumbo pa Trinidad & Tobago, unda 60 minuut despues, el a bira y tuma un rumbo West-Noordwest cu ta hibe direct pa islanan ABC.

   “Airport is closed”: Un ora despues di esey, el a yega isla di Bonaire y pa exactamente 5:57 am (ora di Aruba) e tripulacion di Cockpit a drenta den contacto cu Curaçao Control, pidiendo un “ruta mas direct” pa Aruba.  Curaçao a contesta nan y duna aprobacion pa e ruta, sinembargo den mesun rosea e controlador ta informa Surinam Airways pa corda bon, cu Aeropuerto di Aruba “lo bay habri te 7:00 am”.  E momento ey e avion tabata keto bay na 36.000 pia cu velocidad di riba 500 nudo, y acercando nan destinacion cu keto bay ta ‘Closed’.

   Pa algun seconde tabatin silencio den comunicacion, y diripiente esnan di Surinam Airways na forma sorprendi a pidi Curaçao pa ripiti e ultimo mensahe ey, pues confirma si berdad e Aeropuerto di Aruba ta habri pa 7:00 am.  Curaçao a contesta cu esey ta corecto.

   Personal di Cabina sorprendi: Aki un biaha mas a sigui un silencio di 14 seconde, pasobra ta parce cu ni e Capitan y tampoco e Prome Oficial di vuelo no tabata na altura.  Pues ainda tin 60 minuut mas pa bay prome cu Aeropuerto di Aruba habri, y nan ta apenas algun minuut leu di e isla.

   Despues di esey, esnan di e vuelo a indica cu posibelmente Aeropuerto di Aruba a keda di habri e mainta ey pa 6:28 am, y a pidi Curaçao si por asigna un sector pa e vuelo keda bula “den hold”, pues ta keda draai circulo sperando e horario yega pa Aeropuerto habri, y pa asina nan por baha.

   Curaçao Control a splica e Capitan, cu Aeropuerto di Aruba ta poni pa habri 7:00 am, y tin biaha kizas banda di 6:45 am por tin personal drentando Toren.  Pues pa awor e ta informa nan cu nan lo tin di keda bula den circulo te ora cu Aeropuerto habri.  El a duna nan ordo pa bula den circulo riba e VOR di Sero Arikok.

  Pa exactamente 6:19 am, net ora e avion a caba di pasa riba Sero Arikok y bulando 36.000 pia riba area di Santa Cruz pa Paradera, e avion a cuminza draai su ronchinan birando na man drechi cada rato, y a pidi permiso pa durante e ronchinan aki e baha te na 20.000 pia.  E peticion a wordo aproba door di Curaçao Control.  E prome ronchi tabata uno basta grandi, y pa 6:28 am e tabata bek riba Sero Arikok, y bolbe draai ronchi #2 pero e biaha aki e circulo ta mas chikito.  Mientras tanto el a baha caba te na 22.000 pia.

   A pensa di ateriza na Hato: Aki ta unda cu Capitan a remarca na Curaçao Control, cu bulando ronchi pa 40 minuut largo ta bastante, pasobra nan ta hasta pensando di bay ateriza na Aeropuerto di Hato na Curaçao sperando pa esun di Aruba habri.  A puntra e momento ey si acaso Curaçao ainda no sa si tin hende den Toren di Aruba of no.

   Curaçao Control a splica nan, cu e momento cu tin hende den Toren di Aruba, normalmente ta inmediatamente nan ta comunica cu Curaçao pa informa di esey.  Pero e momento ey ainda nada di personal a drenta.

   Curaçao Control a informa nan cu banda di 6:35 am tin un avion Twin Otter lantando di Curaçao rumbo pa Aruba, pa un vuelo di 20 minuut.  Esaki a pone cu e personal di Surinam Airways a dicidi pa sigui bula nan ronchi.

   Pa 6:36 am, bulando na 20.000 pia, nan a start cu ronchi #3 riba Aruba.  Esnan cu mainta ey a lanta trempan, por a mira e avion aki ta draai circulo riba Aruba.

   Pa 6:40 am, Capitan di vuelo a notifica Curaçao Control cu nan a caba di ricibi informacion di Operations di e Aerolinea, cu banda di 6:50 am lo bay tin personal den Toren di Control.

   Pa 6:42 am el a caba di draai un ronchi aun mas chikito, y e ora pasando riba Sero Arikok a bay pa ronchi #4.   Pa 6:48 net cu nan ta yegando atrobe riba Sero Arikok, pa start cu ronchi #5, Curaçao ta informa nan pa sigui cu nan descenso pa altitud 7.000 pia.

   Aruba ta open: Finalmente pa 6:51 am a notifica Surinam Airways cu Toren di Aruba tin personal laborando, y cu nan lo bay cuminza sigui baha pa asina ateriza.  E avion e ora a start cu nan ronchi #6 pasando riba Sero Arikok.  Pa 6:55 am nan tabata sigui baha, y pasando atrobe riba Sero Arikok, a start cu ronchi #7 cu ta e ultimo.  Despues a haya instruccion pa sigui baha, y pasa pazuid di Aruba, y ateriza.

   E avion a ateriza pa 7:03 am na Aruba sin ningun problema mas.