E midi pa digitalizacion pa avance tecnologico ta un midi humano

Minister Rene Herdé, na apertura di Setar Digital Week:

• E digitalizacion aki ta duna studiantenan instrument pa garantiza exito na cada un 

ORANJESTAD (AAN)  Despues di e apertura di Setar Digital Week, Minister di Telecomunicacion y Infrastructura señor Rene Herdé, a expresa su deseo di exito den e siman aki, cu ta uno necesario, y a dirigi na e publico cu un discurso elocuente, tocante e avancenan di tecnologia digital.

   “Mi ta bisa boso cu si nos no haci learning den e transcurso aki, nos ta bay haya un tecnologia hopi avanza, den un comunidad cu no ta haci uso optimal di dje, y esey lo ta pica; e tecnologia y capacidad di yuda nos den tur ramo di bida”, el a señala.

   E mes ta testigo di con lihe e avance a bay. E mandatario ta recorda tempo cu e tabata biba na Companashi, con complica tabata contesta un telegram cu tabata bin for di Merca, no tabata haye directo pero mester a bay te Landsradio Dienst y tin biaha mester hasta yama un number di otro pais. Awendia su yiunan por yam’e for di Merca ki ora cu nan kier, y e por wak su nietonan ki ora cu ta y unda cu nan ta y con largo e nan ta.

   “Asina, den un generacion di tempo nos a avanza den tecnologia. E ta remarcabel y esaki ta mustra e capacidad di tecnologia. Pero nos mester, e siman aki no solamente wak unda nos ta, pero nos tin cu haci nos mes e pregunta kico mas tecnologia, su capacidad enorme, ta uza informacion pa sirbi hende. Kico mas nos por haci cu ne? Teynan ta yega mi pregunta kico nos no ta bay haci? E midi pa digitalizacion pa avance tecnologico, ta un midi humano den tur area di bida”, Herdé a comenta.

   El a agrega cu e ta sigur cu tin hende ta handle na dje, y tambe na SETAR, pa sigura cu tur hoben den tur distrito y bario di Aruba, haya no solamente acceso na e miho enseñanza posibel pero tambe na uso di tecnologia, pa garantiza cu finaliza scol, pa loke ta e grado, no ta un casualidad pero djis un tema cu tecnologia paso pa paso pa logr’e.

   “Pasobra enseñanza, cu mi mes a traha den dje pa hopi aña, pa nos cuminzamento di aña tabata ricibi un grupo di alumnonan y despues di un siman bo sa cual tin problema y cual no. Y nos no a caba cu suficiente instrumento pa sigura cu tur ta yega e final di scol. Lamentablemente, enseñanza na Aruba y rond mundo ta mucho hopi conoci pa cifranan di exito, pero cu cantidadnan di hoben cu no a logra”, Rene Herdé a señala.

   E mandatario a subraya cu, cu tecnologia aki y digitalizacion ta duna educacion e instrumentonan pa sigura cu tur hoben haya enseñanza cu acento na dje, pero tambe pa programa e forma y e dosis pa cada studiante, cu cada un di nan ta exitoso.