Presidente di Fundacion SIKI PhD Jayburtt Dijkhoff:
Raad van Advies ta indica
ORANJESTAD (AAN)-- PhD Jayburtt Dijkhoff, Presidente di Fundacion SIKI, den entrevista cu Matutino DIARIO, unda el a referi na locual Raad van Advies ta señala tocante e desaroyonan HOFA, locual e ta considera lamentabel. “Basicamente, Fundacion SIKI a sigui e desaroyonan hopi di cerca, y ta hopi lamentabel si, cu e discusion di HOFA a yega na e momento culminante, unda cu nos propio Organo Nacional, cu ta Raad van Advies, a bisa cu e manera con Rijkswet HOFA ta hinca den otro, ta un atake riba nos propio Constitucion, y cu Gobierno no por yega duna poder na otro pais, esaki ta Pais Hulanda, pa basicamente bisa kico por y kico no por haci den nos leynan, sin cu por ehemplo a tene un referendum, of a pidi un mandato hopi cla, cu pueblo cu nos ta entrega parti di nos autonomia, di e forma ey”, Jayburtt Dijkhoff a señala.
Dijkhoff a sigui splica cu a warda riba Raad van Staten, pero corda cu e ta Organo di Hulanda, y nan ta respeta nan Gobierno.
“Nan a wak e Statuto, pero e Statuto, atrobe, no ta liber di pensamentonan colonial di tempo cu el a wordo skirbi, nunca el a cambia, y ta algo di lamenta cu discusionnan no ta sigui riba e punto y ta keda bay den agendanan politico cu tur hende ta trek. Mi ta kere cu mester tin mas discusionnan neutral, obhetivo pa informa pueblo kico ta e consecuencianan. Riba dje, como Presidente di Fundacion SIKI, mi a wak e desaroyo cu a bira hopi duidelijk, cu Prome Minister lo entrega su retiro desde 1 di Januari 2027. Nos lo tin otro Prome Minister, anto akinan nos lo keda warda un par di siman pa wak con e discusion lo sigui, pero atrobe ta di lamenta cu el a keda riba Agenda politico y no a duna un informacion neutral. Pa e motibo aki nos ta kere ta importante pa toch duna informacion y laga tur hende saca nan propio conclusion”, Jayburtt Dijkhoff a señala.
El a sigui splica cu e situacion actual ta cu nos Constitucion nunca a wordo cambia of ahusta, of al menos cu e ta cu mas ley. “Nos ta den un situacion cu nunca a sosode cu nos Status Aparte, y normalmente esaki por wordo acapara door di e tradicion politico of cu reglanan politico, pero nos ta wak cu nos reglanan na Aruba, ta keda cambia constantemente. Kiermen, toch cu nos ta cay riba dje, nos Constitucion no tin e tradicion, no tin ley, locual cu ta keda e momento ey, ta e reglanan di negociacion”, PhD Jayburtt Dijkhoff a remarca.
