Pa comprende atencion total di publico mester conoce historia
*Historia ta duna Leoncita un lugar mas importante cu Benny
*Un analisis di factornan dificil pa hubentud comprende awe
ORANJESTAD(AAN)—E scandal cu a rementa den sector di tereno na Aruba y cu a produci un Avestruz pa historia di persecucion penal di Aruba, tin un interes enorme sigur den poblacion di Aruba.
Ora papia di AVP, no por deshaci di e nomber di Leoncita Arends, cu ta parti di un famia cu mester considera como baluarte di AVP for di existencia di e partido.
Ora bolbe den historia, por nota cu tempo a entrega na Leoncita Arends un lugar mucho mas importante cu Benny Sevinger den existencia di AVP.
Leoncita Arends ta mara na e historia di e partido cu su tata a sirbi cu lazonan estrecho cu famia Eman.
Leoncita ta yiu di un politico di AVP, cu a entrega na e partido un sosten publicitario cu sin duda tabata parti di e exito pa AVP por a canta “Ban Cas Bek” ora Aruba na man di Betico Croes tabata yega culminacion di e lucha Arubano pa Status Aparte.
Na 2013, atrobe AVP a registra un aumento den voto na Aruba cu no tabata na haltura na 2009 Mike Eman a hinca Aruba den un lama financiero bruto, den cual te awe ainda Aruba ta landa.
Maneho publicitario di Mike Eman, sin duda tabata y ta uno di e factornan mas importante den su partido cu ora na 1986 e ruman di Mike Eman a bira Prome Ministro, a permiti Mike Eman bira sombra di su ruman den oficinanan di Gobierno.
Awe ora analisa e caso den Corte di Aruba, ta mira cu ta papia di un Avestruz cu por wordo aplica pues na Benny Sevinger cu a declara cu el a firma loke pone su dilanti, pues por conclui cu su cabez den santo.
Pa publico general na Aruba y sigur e generacion di mas edad cu conoce historia politico di Aruba, e acusacionnan contra Leoncita Arends tabata sumamente interesante pasobra aki ta wordo mustra cu na momento cu Aruba tabata na caminda pa urna electoral na 2013, e inicio di e caso ta sconde.
Awe un pregunta grandi ta surgi, kico lo a pasa cu eleccion si el a tuma lugar na 2014, ora Hulanda a presenta pa splica cu e fiesta di Gobierno Mike Eman a termina y cu Aruba ta den problema serio.
Ta e realidad aki ta wordo presenta na un forma prominente den Sala di Corte di Aruba, caminda hubentud cu no conoce historia di Aruba, lo tin problema pa comprende e reaccionan di publico.
Na e momentonan aki, Aruba ta pendiente di loke ta pasa den sala di Corte di Husticia di Aruba cu a drenta Siglo 2000 cu e caso Fondo Desaroyo Nobo di San Nicolas cu a haci cu cuatro exponente di AVP a presenta dilanti Huez y tres a wordo sentencia.]
Awe Avestruz ta rementa den sala di Corte y ta laga atras un pregunta grandi. Si Avestruz tabata tin motibo di bira un caso den Corte, kico ta e moral di partido AVP?
