Luenne Gomez-Pietersz, directora di DIMP
ORANJESTAD (AAN): Directora di Departamento di Impuesto (DIMP), Luenne Gomez-Pietersz, a elabora riba e funcion di un departamento di impuesto den un comunidad unda el a indica cu nan tin dos pechi. Nan ta duna conseho na minister di finansa y conseho di minister. Tambe nan ta un departamento cu ta ehecuta e decisionnan di e mandatarionan.
E directora di DIMP a sigui bisa cu nan ta bin den e trayectoria di 'Landspakket' caminda cu 13 di November 2020, diferente isla den Caribe a wordo firma den acuerdo cu Hulanda, pa por introduci cierto reformanan y cu ta reformanan cu tin añanan caba ta papiando di dje.
Akinan por menciona di e reforma fiscal di cual a cuminsa cu un prome tanda na 2019. Na 2020 un di dos tanda a bay Parlamento, pero cu e pandemia esaki a para, a señala.
Na 2021 a cuminsa bek cu tur e combersacionnan cu Hulanda hunto cu Conseho di Minister pa yega na cierto calculonan y pa por a yega na un pakete nobo di reforma cu ta alinea cu loke a palabra cu Hulanda relaciona cu e 'Landspakket'.
A bisa cu den e pakete aki, entre otro, tabata e introduccion di un BTW. Despues cu a yega na otro y Conseho di Minister tambe a bisa, okey ta bira momento pa bay papia cu stakeholdernan importante pa mira con esaki por wordo poni den practica, ki tempo ta implement'e, etc.
Segun Gomez-Pietersz, nan a cuminsa sinti cu e cambionan cu ta wordo proponi ta hopi riba man. Nan a wak cu comercio no ta contra introduccion di un BTW, pero si a mira tambe cu tin hopi influencia cu no tin control riba dje.
El a agrega cu por ehempel, a drenta e momento cu a bin inflacion cu mundialmente tin hopi efecto riba prijsnan tambe na Aruba mirando cu ta importa mayoria di producto.
E cambio di un sistema di BBO pa BTW tambe ta trece un inflacion cu ne. Ariba dje tin e inflacion cu ta importa y lo tin un inflacion cu e introduccion di un BTW, Gomez-Pietersz a splica.
Esaki tambe ta cambia e panorama cu nan tabata bezig cu ne y finalmente a wak cu gobierno a tuma e decision pa wanta introduccion di BTW mirando cu e situacion ainda no ta stabil y cu ainda mester tene cuenta cu otro factornan cu no tin control riba nan, y cu no lo ta un bon momento pa introduci un impuesto 'BTW', a bisa.
Den mesun rosea, ora cu ta papia cu expertonan cu ta analisa y tambe cu CAft cu ta bisa kico si y kico no ya cu tin cierto palabracionnan pa cu presupuesto di pais Aruba 2022 y 2023 caminda cu ta mira cu CAft y Hulanda ta keda pone enfasis riba acuerdonan cu tin cu cera 2023 cu un surplus di 1 % di GDP (60 miyon florin).
Esaki ta nifica, a bisa, cu esaki ta un pais cu ta saliendo for di un pandemia unda tin deficitnan grandi den presupuesto cu ta normal. "Loke si ta importante pa remarca y nos ta wak cu IMF y tur otro instancia internacional cu ta bezig ta wak e situacion financiero di Aruba hunto cu nos, ta cu nan ta bisa cu nan ta wak e forsa grandi di e economia di Aruba".
Aworaki casi dos aña despues di e pandemia, e presupuesto 2022 y 2023 ta mustra ainda un deficit hopi chikito cu ainda lo por traha riba un presupuesto balansa y e surplus cu ta wordo proponi, a señala.
Finalmente, Luenne Gomez-Pietersz a indica cu ta sali for di un deficit financiero di 700 miyon florin na 2020 y pa aworaki na 2022 ta na 148 miyon florin of menos. Den e presupuesto 2023 tin un deficit hopi mas chikito di un 20 miyon ainda.
Ta un stap basta grandi a duna for di un deficit di 700 miyon florin na un di 20 miyon na 2023, e directora di DIMP a declara.
