ORANJESTAD (AAN): Dia 29 di oktober FRED Expo ta bolbe tuma luga na Rotterdam despues di un ausencia di 3 aña pa motibonan cu nos tur conoce, e pandemia.
Awo cu por atrobe, e meeting point fisico den forma di un job fair por tuma luga manera cu ta custumbra.
E organisadornan ta priminti di trece dilanti un programa yena cu no solamente organisacionnan participando cu nan booth, pero tambe un programa cu diferente orador, panelista, workshops y presentacionnan pa studiantenan y profesionalnan na Hulanda.
Mas cu 25 compania y organisacion di e islanan Caribe Hulandes, for di sectornan financiero, hotelero, medico, IT, huridico, y logistico ta hasiendo e biahe pa Hulanda pa recruit talentonan pa añadi na nan ekiponan local. MCB Group lo ta presente cu representantenan di Caribbean Mercantile Bank, Maduro & Curiel's Bank y Windward Islands Bank.
"E meta principal ta keda mesun cos cu semper," co-organisador Tristan Every ta menciona, "pa sigui crea un luga fisico caminda dunado di trabao di e islanan por topa y conoce buscadonan di trabao na Hulanda y asina sigui combati e brain drain cu e islanan conoce pa añanan largo."
Co-organisador Quincy Sintiago ta añadi: "Human interaction ta un yabi clave den atrae talentonan. E hecho cu por duna otro un man, mira otro den wowo y sinti otro su vibra, den mayoria caso ta e factornan determinante pa convence otro cu ta un match."
FRED Expo ta tuma luga dia 29 di October na WTC Rotterdam.
