Parlamentario Marco Berlis (MEP)
ORANJESTAD (AAN): Diamars 28 di juni Parlamento a reuni hunto cu Algemene Rekenkamer, pa asina nan por a duna un rapport di nan investigacion riba FASE. E rapport aki a worde traha basa riba e economia, eficiencia y efectividad di FASE den su totalidad.
E rapport aki di ARA ta contene un banda elogio pero tambe a señala areanan na unda cu Gobierno mester trece mehoracion riba dje. E miembronan di ARA a cuminsa e investigacion aki na 2020 y a traha for di cas pa por a completa esaki.
E rapport a cuminsa cu e parti den cual ta elogio Gobierno riba diferente punto;
- ARA a pone enfasis cu Gobierno di Aruba a zorg pa FASE tabata hopi accesibel pa pueblo;
- Gobierno a responde hopi rapido na necesidad di pueblo;
- Ademas gobierno a duna hopi informacion pa pueblo por compronde y aplica pa FASE;
- Gobierno a duna suficiente informacion pa yuda e ciudadano yena e formulario pa asina e por yena esaki exitosamente;
- Tambe e rapport ta indica cu e placa cu a paga pueblo tabata suficiente pa cubri tur necesidad basico.
Nos no mester di recorda niun hende e condicionnan cu tabata reina na 2020 durante e pandemia. E tabata un tempo basta caotico y no tabata tin un manual pa guia gobierno durante e temponan di desafio historico aki. Asina mes, sin un manual y sin un guia experto, Gabinete Wever-Croes II a tuma e curashi pa atende y zorg pa e pueblo su necesidad bin prome. No tabata tin tempo pa warda te cu un ley ta cla prome. Esey lo a tuma masha hopi tempo y e tabata imperativo pa pueblo por a come y sigui paga su gastonan.
E rapport tambe a trece puntonan unda mester di mehoracion;
- Mester percura pa tin suficiente hende den e ekipo di FASE cu tin diferente area di experticio;
- Mester establece e ley di FASE (Esaki a sucede Dialuna July 4, 2022);
- Zorg pa tin controlnan y un maneho den lugar pa evita abuso y corupcion den e sistema;
- Mester asegura cu tur casonan worde trata di forma igual;
- Organiza mihor con ciudadanonan por haya informacion riba nan peticion di FASE.
Berdad tin lugar pa mehoracion, sinembargo ban spera cu nunca mas nos mester uza e ley aki. Ban spera cu nunca mas Aruba mester pasa den semehante calamidad. Ban spera esey di curason. Mientras tanto e ta keda awor na gobierno pa tuma e consehonan di gobierno y fortalece e maneho y structura di FASE. Un cos ta sigur, gabinete Wever-Croes lo sigui haci tur cos den su poder pa yuda y salba nos pueblo pasa door di e retonan actual di e tempo dificil aki.
Si pueblo desea mas informacion di e articulo aki, contact mi na tel: 528-4639 of email mi na: This email address is being protected from spambots. You need JavaScript enabled to view it. / Bo parlamentario y sirbidor di pueblo na bo ordo semper!
