Cardenal na Venezuela ta convenci
CARACAS: E Cardenal Baltazar Porras, kende ta administrador di Arquidiocesis di Caracas, a bisa cu e logro di e beato José Gregorio Hernández “no ta danki na propaganda”.
Cardenal Porras a bisa cu su relato a plama danki na loke “su bida a nifica, su ehemplo y su testimonio y esaki ta loke a wordo transmiti tur caminda. Despues di e beatificacion esaki a multiplica aun hopi mas.”
Den un entrevista cu un emisora venezolano, el a splica cu pa bo bira un beato bo mester a haci un milagro. Pa e canonizacion bo mester tin un otro milagro despues di e beatificacion.
El a bisa cu a presenta hopi fabor y posible milagro for di rond mundo. “Nos tabatin 3, pero e regla canonico ta mustra cu mester escoge solamente uno”.
El a bisa cu nan a escoge uno, despues di analisis di expertonan, y esaki a socede na Miami. “E milagro tabata riba un pashent venezolano cu tabata den estado casi morto caba, cu tabatin mester di un transplante pero e clinica a duna conseho negativo, y e tabatin un serie di problema tambe cu su higra, riñon, curazon, y diabetes.”
“E tabata bulando di alegria, y completamente saludable, ora cu nan a bay cune pa Sala di Operacion pa mira kico e tabatin.”
“Lo mas curioso ta cu e docternan cu tabata trate, tabata uno Hindu, y e otro ta un Hebreo, di tal manera cu nan no ta Catolico pa mira con ta bay acomoda esaki,” el a comenta.
El a agrega cu e cadena di oracion no a wordo haci door di e pashent di 40 aña, sino pa su famia y amigonan rond di dje, ‘cu tabata mas morto di bibo’.
“Nos tabatin e alegria di hiba e foldernan aki y entrega esaki na Vaticano un siman pasa. Papa Francisco mes a emociona su mes masha hopi, pasobra el a bin ta promove e intento pa declara José Gregorio Hernández como co-patron di Catedra di Paz,” e Cardenal a bisa.
E ta kere cu e beato ta “un ehemplo y modelo”, pasobra ta existi un anecdota real di cu na Venezuela den Siglo 20, sin importa loke tabata pasando den mundo, e tabata preocupa cu Prome Guera Mundial y a ofrece su bida na Señor den su oracionnan si e guera caba.
Y e fin di e guera, e firmamento di acuerdo di paz, a coincidi cu e morto di José Gregorio Hernández.
Segun e Cardenal, den e situacion actual di e guera entre Rusia y Ucrania, “Papa mes a pidi nos pa tene un simposio encuanto José Gregorio na Universidad Laterano na Roma, unda e catedra ta situa pa fin di October venidero.
El a bisa cu awor e folder di e milagro di Miami tin di wordo examina pa un comision medico pa determina te unda ciencia ta yega, y despues e Comision di Teologo lo analiza e testimonionan y esaki lo bay pasa pa e Comision di Cardenalnan cu lo analiza atrobe mas cos “y lo bay presenta esaki na Papa pa asina e wordo declara, y probablemente e proceso aki lo bay tarda entre 6 luna pa 1 aña.”
