E interes grandi di e hobennan pa bay duna show di baile

ORANJESTAD (AAN): E hobennan talentoso ta cla pa presenta tur loke nan por pa pueblo mira! 

Nan lo ta baliando e personahenan principal den nan show benidero, esta “The Nutcracker” cu lo tuma lugar na Cas Di Cultura den e prome fin di siman di December.

   E studiantenan aki ta practicando y preparando pa e presentacion for di september y trahando hopi ora nan largo pa por presenta un show di calidad.

Leonid Kozov, director di Kozlov Dance Academy cu a tuma parti como bailado principal di e tan renombra Bolshoi Ballet na Moskou, Russia y tambe di New York City Ballet hunto cu su casa prima bailarina Adriana. Nan ta entrenando nan studiantenan den ballet clasico den forma Ruso pa 8 aña riba e isla.

   Nan academia di ballet ta yena cu alumnonan talentoso cu disciplina y determinacion ehemplar. E diferente calidadnan di e studiantenan ta engrandece e presentacion treciendo variedad.

   Un di nan studiante cu ta traha hopi duru y ta hopi dedica ta Liselotte van Doorn, di 13 aña di edad. el a competi na maart pa prome biaha na un competencia internacional di ballet y ganado dos medalla plata. Liselotte lo baila e parti di e ‘Sugar Plum Fairy’. E ta baila un solo hopi unico pasobra e musica ta toca cu un instrumento raro, e celesta. Liselotte tin un fuerte tecnica y tambe el baila e ‘Pas de Deux’ cu Meneer Kozlov. Liselotte ta e destinatario di e EYoung Talent Fund via Stichting Prins Bernhard Cultuurfonds Caribisch Gebied.

Tin otro bailarina prometedor, Veronica Stetsenko, di 12 aña di edad, cu ta destaca door di su cualidad nan expresivo riba escenario. E lo ta baila e parti di ‘Dewdrop’ den e ‘Waltz of the Flowers’, ‘Columbine Doll’, ‘Snowflake soloist’ y ‘Marzipan’.

   Dos mas balarin cu lo baila na un nivel halto, ta Sarah-Ange van der Vaart y Joshue Garcia. Sarah-Ange ta un studiante na e academia desde cu el a habri. E aña aki, el baila dos partinan nobo: ‘Arabian Coffee’ y ‘Snowflake soloist’. E publico lo disfruta di su interpretacion artistico y su elegancia. Den e añan pasado, Joshue tabata baila hopi parti principal den varios produccion di e academia. Den “The Nutcracker” Joshue lo baila e partinan di e ‘Mouse King’ y ‘Chinese Tea’. E ta un balarin cu un energia tremendo y un favorito di e audiencia.

   Studiante Cloé-Margeaux van den Berg (11 aña) , lo balia cu Aleksey den ‘Russian Trepak’. Ocho aña pasa, ora e tabatin 3 aña, el baila e parti di ‘angel’ di e muchanan chikito. Cada aña el a baila un parti nobo, y e aña aki Cloé-Margeaux ta baila su prome parti solista.