Cifranan di Oficina di Estadistica:
*Azeta y otro productonan traha di vet a subi cu 20.3%
ORANJESTAD (AAN): E indice di “Cuminda & servicio di catering” a registra un subida di 0.7% na October 2022, despues di un subida di 0.5% na September 2022. E indice di “Cuminda na cas” (1.0%) a registra un subida, unda dies (10) di e diesun (11) indicenan di e gruponan di cuminda na cas a subi na October 2022.
E indice di “Batata, yuca y batata dushi” a conoce e subida di mas grandi (7.7%) na October 2022. Otro subidanan significante a wordo registra den e indicenan di “Berdura” (3.3%), “Pisca y otro cuminda di lama” (2.9%), “Azeta y otro productonan traha di vet” (1.9%) y “Bebida no-alcoholico” (1.7%).
E unico caida na October 2022 a wordo registra den e indice di “Fruta” (-1.1%).
Den e ultimo diesdos (12) lunanan e indice di “Cuminda & servicio di catering” a subi cu 10.7%. E indice di “Cuminda na cas” a conoce un subida di 12.8%, unda tur e diesun (11) indicenan di e gruponan di cuminda na cas a subi durante e ultimo aña.
E indice di “Azeta y otro productonan traha di vet” a subi cu 20.3%, e subida di mas grandi entre e gruponan di cuminda na cas. Otro subidanan significante a wordo registra den e indicenan di “Batata, yuca y batata dushi” (19.4%), “Carni” (16.2%), “Pisca y otro cuminda di lama” (16.2%), “Lechi, keshi y webo” (13.9%) y “Fruta” (11.9%).
E indice di “Cuminda pafo di cas” a baha cu 0.1% na October 2022 y a registra un subida di 5.9% den e ultimo diesdos (12) lunanan.
Na October 2022, “Cuminda na cas” y “Cuminda pafo di cas” como grupo, tawata tin un subida di prijs di 0.7% compara cu September 2022 y hunto tawata tin un influencia di 0.11 ppt riba e CPI, mientras cu e restante bienes y servicio hunto a experencia un caida leve di prijs di 0.02% y tawata tin un efecto di -0.02 ppt riba e CPI.
{gallery}E indice di Batata, yuca y batata dushi a conoce e subida di mas grandi na October 2022{/gallery}
