*Y posiblemente na September y October tambe - ORANJESTAD (AAN) – CEO di Aruba Tourism Authority (ATA), señora Ronella Croes a participa den e conferencia di prensa, relaciona cu e update tocante Covid-19 den e di 4 ola di e pandemia.
Señora Ronella Croes a cuminza bisando cu e cifranan a sali pa Luna di Juli, y ATA ta remarca algo cu ta bin dilanti na varios ocasion.
Esaki ta cu e recuperacion economico y e recuperacion di turismo tabata canando hopi bon. ATA a cera Luna di Juli cu un total di 100.178 turista cu a bishita Aruba.
“Pues, pa prome biaha desde e reapertura di nos frontera, nos a surpasa e cifra di cien mil bishitante pa luna. Y si mira e grado di recuperacion mensual, esaki ta mustra un linea cu ta bay ariba, pa varios luna caba. Esaki ta algo cu mester wordo tuma como algo automatico, pero cu a tuma hopi esfuerzo di hopi hende, y trabaonan hopi duro. Por, incluso, mira cu luna di Juli e mercado principal cu ta e Luna di Juli, a mustra un crecemento di 9% compra cu Juli 2019. Tambe e mercado Hulandes a mustra un crecemento di 39% compara cu Juli 2019. Y aña 2019, tabata un mercado record den varios tereno di e mundo di turismo. Tambe AHATA a saca su resultadonan y a mira cu esnan cu a bishita na Juli tabata dispuesto pa paga 4% mas pa anochi, pa un estadia na Aruba, bao di e hotelnan miembro di AHATA. Pues, e ta un indicador di e demanda fuerte cu tin pa Aruba, y e resultadonan fuerte cu nos a bin ta mira”, Ronella Croes, CEO di ATA a declara.
El a expresa cu esaki tur meymey di un pandemia. Pues, e resultadonan cu el a comunica, por bisa cu no ta algo normal ni cu mester tuma como algo normal, y cu mester corda unda nos tabata ta aña pasa, apenas.
“Y no por enfatiza suficiente, e forza di e recuperacion cu nos tabata mira pa Aruba. Uno cu hopi pais na mundo no tabata mira. Pues, no ta algo atrobe, cu nos tin cu tuma como automatismo pero algo unico meymey di un pandemia y un situacion di crisis. Y kizas e beneficio no a yega na abo. Kizas bo ainda no a beneficia di esaki, pero un cos nos tur sa cu e grado di recuperacion y e rapidez di esaki, tabata cana dilanti sigur di tur proyeccionnan cu tabata tin ora cu nos a traha plannan y proyeccionnan pa e aña aki, y conforme cu nos tabata bay di luna pa luna”, Ronella Croes a subraya.
El a agrega cu ta un cuestion di tempo tambe cu lo a sinti e beneficio di e recuperacion aki na un manera mas rapido, cu kizas nan lo a anticipa basicamente.
Sinembargo, pa luna di Augustus, lamentablemente, e panorama aki a bolter. Augustus lo mira un reduccion di e cantidad di turistanan, compara cu e ultimo lunanan. “Pues, e tendencia di cu cada luna nos ta mira mas y mas y mas lo no ta e caso e luna aki. Despues di a surpasa 100 bishitante na Luna di Juli, ATA ta mira cu e luna aki lo por duna nos entre 90 mil bishitante of hasta menos. Tambe nos ta mira cu September ainda, nos lo por ta, mirando e impacto di locual ta e ola cu nos ta mirando aworaki, incluso October tambe. E ta un hecho cu cancelacionnan ta drentando, nos a bise na comienzo di siman, cu nos lo monitor y wak cuanto esaki ta, basicamente”, Ronella Croes a subraya.
