Michael Robert, Lifeguard:
- Hasta KPA kier presencia di Lifeguardnan na Aruba
ORANJESTAD (AAN) Michael Robert di Aruba Lifeguard Foundation, a expresa den entrevista cu DIARIO, cu bida di hende ta sagrado pa un y tur y p’esey ta asina importante pa tin un bon sistema di salbabida Riba beach na Aruba.
Michael a topa cu Ministro nobo Wendrick Cicilia y el a papia cu ne tocante e incidentenan cu ta pasando riba lama na Aruba, y casualmente un di e incidentenan cu a sosode na Mangel Halto tabata cu un familiar di Cicilia mes. “E di cu mi, pa lague sinta y e lo tuma contacto cu mi. Ban spera cu tur cos cana bon. Esaki no ta politiek si, esaki ta pa Aruba, pa seguridad di nos hendenan y nos bishitantenan”, Michael Robert a señala.
Otro aspecto cu el a trece dilanti y cu e ta cuestiona ta cu e guynan cu nan a pone patruya den e area di beach ningun di nan tin certificado di lifeguard. “Nan ta e prome cu yega na e sitio ey y ningun di nan ta certifica pa bula den awa rescata hende cu por ta den problema riba lama”, el a remarca.
E idea di Lifeguard Foundation ta cu den cada beach tin un tower cu un lifeguard certifica di tal ora pa tal ora.
“Nos ta cuminzando di Baby Beach unda lo bay tin un tower anto e trahadornan lo ta patruyando entre Baby Beach cu Rogers Beach, te cu Mangle Halto cu ta un distancia basta bon. Anto di Eagle Beach te cu Arashi lo tin un tower cada banda, anto na cierto parti di hotelnan nos ta pone stoelnan”, Michael Robert a duna di conoce.
E motibo pa pone stoel ta pasobra hotelnan no kier un tower dilanti nan edificio, y si nan kier mas bista riba nan turistanan, anto nan ta aplica pa mas personal di lifeguard.
“Actualmente cada 4 luna nos personal ta certifica nan licencianan. Nos ta cay bao Cruz Cora, y nan tin un parti cu nan ta entrena e personal di Lifeguard”, el a declara. Aworaki Lifeguard Foundation ta trahando cu campamento, hunto di Cuerpo Policial, y Cruz Cora tambe ta activa cu KPA. “Y nos ta wak ki positivo e aña aki ta bay ta, pasobra KPA mes ta bisa cu nan kier Lifeguard di Aruba: (1.) Pasobra bo ta bezig ta salba hende su bida. (2.) Bo tin mas control riba ladronicia tambe, pasobra bo no ta haci trabao di Lifeguard so. Y mi a papia cu algun polis y desde aña 90 nan a haci curso di CPR, y tur aña cosnan ta cambia. Y mi ta bisa stop di hinca turista den peliger, ban zorg pa nan seguridad pasobra nan ta nos pan di cada dia”, Michael Robert a vocifera.
