Edwin Jacobs, director SVb:
ORANJESTAD (AAN) — Director di SVb, Ir. Edwin Jacobs, a relata den entrevista cu DIARIO, cu e grupo di personanan cu ta ricibi pensioen di behez di SVb, nan tin nan parti den tres: entre esnan cu ta naci na Aruba, esnan cu a nace den Reino, y esnan cu a nace pafo di Reino.
Loke ta pasa tin biaha ta cu esnan cu a nace na Aruba cu tin un pensioen corta, un bon parti di nan ta biba na Hulanda anto nan ta complementa cu e pensioen di AOV di Hulanda.
E grupo cu a nace den Reino tin biaha tambe tin un pensioen di Reino. E sistema di AOV-AOV ta algo tipico di e sistema Hulandes, Jacobs a menciona.
“Masha poco pais tin e y esnan cu a nace pafo di Reino no conoce esaki. Si nan a biba diez aña asegura den nan pais, nan no tin e tipo di seguro aki. P’esey nos a partie den tres, y bo ta ripara cu e problema mas agudo di e pensioen corta ta di esnan cu a nace pafo di Reino”, Jacobs a señala.
El a subraya cu tin un grupo grandi di hende cu a bin Aruba 30 of 40 aña pasa, cu nunca a yega 100% di pensioen, nan scala ta cay den 600, 700 pa 800 florin, y eynan bo tin cu bisa si nan a contribui enormemente na Aruba, bo ta wak con yuda nan den esaki.
“Hopi biaha nos tin e pensamento cu e personanan aki ta bay bek nan pais, pero esey no ta e caso. Ora bo biba 30 of 40 aña den un pais, bo ta anhela si bo mesun pais, esaki ta algo cu emigrantenan, mundialmente, ta biba cu ne, pero bo raiznan no ta dje fuerte mas. Mi a combersa cu diferente hende cu a bay bek nan pais, y despues di dos siman nan ta bin bek cas. Y unda cas ta pa nan? Aruba! E trankilidad, seguridad cu na Aruba tin, na nan pais nan no tin’e. Y esey den bo behez tambe ta hunga un rol”, Edwin Jacobs a señala.
El a sigui splica cu e grupo aki ta bay sigui crece pa añanan 30, unda cu e velocidad di crecemento ta bay reduci, pasobra esnan cu ta drentando edad di pensioen ta di aña 60. E añanan 60 nan tin un famia un poco mas grandi, pero ya di 65 bin ariba, e grupo ta bira chikito, y asina ta sigui consecutivamente.
