Politica barata mester wordo reemplasa enfrente futuro serio
- Turistanan tambe ta victima di inflacion na nan pais
- Recesion 2023 ta exigi atencion di tur gremio di Aruba
ORANJESTAD(AAN)- Politica barata na Siglo 20 a haci cu Aruba a cay den uno di su pio momentonan ora e Pueblo di Aruba a wordo uza pa politica barata, cu no a guia Aruba segun concenshi y saber.
Te awe Aruba mester lucha cu un debe nacional cu a wordo causa na momento cu wega politico a wordo hunga cu BBO na momento cu mundo a conoce recesion, cu a afecta Aruba tambe.
Si na 2009 Aruba no por a realisa cu e mester tabata sumamente cuidadoso cu un recesion mundial y kico esaki ta nifica, awe e gran berdad ta presenta su mes y henter mundo ta na haltura cu recesion ta nifica problema financiero serio pa e pais, pa comercio y pa e trahadornan.
E epoca di turismo 2022-2023 sigur ta importante na momento cu ya nos a drenta luna di October y asina na porta di loke mester ta inicio di e temporada financieramente y economicamente productivo pa e pais.
Kico e situacion mundial lo haci cu empresanan na Aruba? Cuanto placa e turistanan lo gasta y con nan lo trata di baha nan gastonan cu resultado pa e entrada di tur hende y instancia cu ta presta servicio na turismo?
Nos mester para keto na e realidad aki pasobra e hecho cu un cierto cantidad di turista ta bini Aruba, no ta e factor determinante pa e produccion turistico.
Cuanto placa e turista tin disponibel pa paga durante vacacion si tene na consideracion e gastonan grandi cu hende tin pa biba na Merca, Hulanda y rond mundo?
Wega politico mester stop na Aruba y na prome lugar no mester mara e gastonan di coriente y awa na wega politico y forma pa dal gobernantenan den un situacion cu mundialmente bida a bira mas caro y mas peligroso.
E turista ta paga mas na awa y coriente na su cas tambe y esaki ta haci cu e por tin menos den su cartera pa e gasta na Aruba.
Na un forma sumamente consciente Aruba mester drenta e temporada di turismo dilanti porta y tene na consideracion tambe cu cualkier momento por surgi situacionnan, cu por afecta e cantidad di turista cu Aruba ta spera di ricibi.
Ta conoci cu hopi turista ta planifica nan gastonan hopi tempo adelanta y e hecho cu nan a book pa por bini Aruba prome cu problemanan mundial a culmina, tambe por haci cu nan ta bini Aruba pero cu e placa cu ta spera cu nan lo trece.
E situacion mundial ta sumamente alarmante y cualkier problema serio na nivel politico internacional por mishi cu turismo cualkier momento durante e temporada 2022-2023.
Tur cu ta participante den e sector turistico mester laga sano juicio prevalece enfrente un ala di economia sumamente fragil, cu turismo ta keda.
Awe mester prepara pa entrada pa e temporada halto di turismo pero mester realisa cu e turista ta habitante di planeta Mundo, cu ta wordo confronta cu situacionnan sumamente serio pa cual mester ta prepara.
Tur gremio na Aruba y sigur e sector politico cu mester di voto den eleccion, mester comprende cu na e momento aki mester biba cu e realidad di un momento den problema serio.
