Campaña pa Florin lora na Aruba mester haya inicio awor
- Placa cu por produci mas entrada pa Aruba ta bandona pais
- Soño falso ta destrui entrada di Gobierno y di empresa local
ORANJESTAD(AAN)- “Con economia di Aruba por florece si e placa cu e ciudadano ta gana na Aruba, ta wordo gasta den exterior?” Pregunta cu a wordo lanza na DIARIO cu ta den un proceso di investigacion y presentacion di instrumentonan cu mester yuda Aruba sigui cana den un futuro dificil riba tereno economico, financiero y social.
Con Aruba por conoce bon resultado economico, ta depende di e forma cu Aruba mes ta sostene su economia y esaki no ta solamente mara na Gobierno.
Na tanto ocasion DIARIO a papia di e forma barbaro cu placa cu ta wordo traha na Aruba, ta bandona e pais pa motibo di compranan personal cu ta wordo haci den exterior y hasta existencia di black market, cu ta destrui economia di Aruba pero tambe ta haci medidanan financiero mas necesario y ta stroba e pais cumpli cu su debernan social.
“Un soño falso ta destrui entrada di Gobierno y di empresa local y finalmente e entrada di trahadornan cu no por mira nan salarionan subi den un comunidad cu no ta haya e servicio cu su placa en general mester produci.”
Na palabra un informante experto di DIARIO cu ta mustra cu mientras compra den exterior ta sigui afecta benta na Aruba, e pais ta den problema serio.
“Gobierno ta depende di placa di belasting pa e fnciona. E placa di belasting aki ta wordo paga dor di trahador pero sigur dor di empresanan cu ta crea trabou na Aruba.
E placa cu e Pueblo di Aruba produci, ta pues e produccion nacional riba cual tur planificacion sano pa e pais mester ta basa tanto riba tereno gubernamental, empresarial pero tambe dor di e ciudadano directamente.
Pa Gobierno haya placa den su caha, e trahador mester traha y e comerciante mester produci su entrada.
Si tur hende bay haci compra den exterior, comercio mester cera su porta na Aruba, loke ta nifica cu no tin trabou mas pero tampoco placa pa comerciante, trahador y politico den funcion paga belasting.
Segun informantenan mester coy e baca na su cacho y mester cuminsa cera e porta cu ta habri pa un parti grandi di placa cu Aruba produci como nacion, resulta den exterior.
“Si Aruba ta mas caro cu tur otro pais na mundo, ningun turista ta bini Aruba,” a wordo trece dilanti.
Na e momento cu bida na Aruba bira demasiado caro, cantidad di turista ta baha pasobra e turista di awe no ta e grupo chikito cu durante e prome parti di Siglo 20 tabata forma e base pa turismo.
Ademas hasta hende cu placa no ta abusa di nan placa y no ta bay un pais si e calidad no ta cuadra cu loke nan ta paga.
Cu un persona ta cumpra algo special den exterior, no ta problema segun e informante cu a mustra cu mester papia di un problema si mira cuanto compra ta wordo haci dor di ciudadanonan den exterior, loke ta afecta comercio local directamente.
Si comercio local no produci placa, e no por paga trahador bon salario pero tambe por paga tur e belastingnan cu e mester paga. Esaki ta nifica cu personal mester bay cas y cu Gobierno no ta haya suficiente entrada loke ta nifica cu Gobierno mester tuma medida pa haya e placa suficiente pa e pais por funciona.
“E placa cu segun cifranan oficial ta entrada di Gobierno, ta aumenta si tuma medida cu mester tuma cu ta encera actuacion severo contra importacion scondi di productonan cu por cumpra na Aruba tambe,” informantenan a bisa.
Si tene na consideracion cu e Arubiano cu ta haci compra den exterior mester paga un pasashi, estadia y cuminda den exterior pa e cumpra loke e ta considera mas caro na Aruba, por mira cu ta fantasia ta causa problema pa mas entrada di Aruba,” e informante a trece dilanti.
Na su opinion mester cuminsa actua contra black market na forma hopi mas severo pero tambe mester bini cu programanan informativo den cual ta duna prueba na e Pueblo di Aruba cu Florin mester lora na Aruba den comercio, cu ta fuenrte di trabou pa e trahador.
Ora e Florin lora e gobernante, e trahador y e empresario tin placa pa paga belasting na un forma mas suave sin medida pisa cu ta resultado tambe di e votador cu mester mira riba kende e ta vota y no mester vota pa hende cu ta destrui Aruba financieramente.
