Den un decadencia nunca conoci den historia di Aruba y Reino - Chupa voto ta hiba Aruba na e momentonan mas scur di e pais - Mucha inocente ta wordo destrui den asesinato di democracia y moral
ORANJESTAD(AAN)- Parlamento di Aruba ta herencia di homber y muhenan di principio, curashi y amor pa e isla yama Aruba.
Parlamento di Aruba a nace den perseveransa di un Pueblo, cu ora el a wordo laga na caya pa lidernan cu a traiciona e lucha di libertad y autonomia di Aruba, a sigui cana na man di un lider autentico, cu na 1983 a entrega Aruba su Status Aparte.
Aruba no ta pais di hende sin berguensa, sin moral, sin concenshi y sin piedad. Aruba ta pais di hende integro, hende cu ta defende balornan halto cu ta e motibo pa cual na 1986 e bandera di e pais autonomo den Reino por a dorna oficinanan di e Gobierno y e Parlamento di Aruba.
Na 2021 un constelacion nobo di Parlamento a mira luz den eleccionnan, cu ya tabata cubri pa berguensa pa motibo di participacion di un candidato, Benny Sevinger, cu tabata den prison di Aruba pero a haya e sosten total di su partido pa drenta Parlamento siendo acusado den detencion preventivo encarcela den prison.
Di e forma aki e partido cu den e lucha pa separacion di Aruba, a traiciona e Pueblo di Aruba y a pone horca na garganta di autonomia di Aruba cu a wordo poni bou pia di Antia Hulandes, a bolbe entrega prueba pa e balor cu nan tin pa Parlamento y e Pueblo di Aruba cu Parlamento ta representa.
Na 2017 e partido cu a traiciona lucha di Aruba, no a haya e cantidad di asientonan cu el a pidi despues cu el a trapa riba ley pa humilia Parlamento y firma un acuerdo secreto pa Parlamento cu Nicolas Maduro, pa asina contra ley por a trece Citgo cu autoridad Mericano ta considera centro di crimen di estado Venezolano na Merca.
E partido berde a trapa riba bienestar di e Pueblo di Aruba ora miembronan di Parlamento di AVP, a entrega Gobierno Mike Eman, un suma di 1.6 Biyon pa Mike y Benny Sevinger spart sin control di Parlamento.
Ora nan a perde eleccion na 2017 y Mike, nan a trapa cu bota riba reglanan di decencia di Aruba den Parlamento cu un avalancha di redashi sushi contra contrincantenan politico y sigur e partido di Prome Ministro Wever-Croes cu mester a saca Aruba for di e desaster cu Gobierno Mike Eman a crea.
Den e ola di lodo cu e partido berde a basha den Parlamento, e Era di Vibora a bira realidad.
Pa por ataca, a bay den bida priva di exponentenan di MEP y uza un mucha, un criatura inocente, pa sin prueba legal destrui e exponente di MEP, Rocco Tjon.
Ta tristo pa mira con hasta ora Huez no a haya prueba contra Rocco Tjon, pa hunga politica a sigui uza un mucha y te awe ta sigui herida e mucha pa haya voto pero tambe pa kita bista for di loke ta pasa den campo di AVP.
Pasobra pia di AVP cu ta un pauwis, si tabata sushi segun Huez for di 2008 ora Mike Eman a presenta pa dirigi Aruba despues cu tres Ministro di AVP a wordo condena pa Husticia.
E berdad di AVP mester a wordo scondi pa Aruba, cu Mike a ciega cu e desaster di mita BBO, pa AVP cu pia hundi den condena di Huez, gana eleccion.
Asina caminda a habri pa abuso wordo haci cu Aruba cu Hulanda mester a rescata for di man di Mike Eman y e gang di AVP, cu a laga un lama di debe atras pa un Aruba cu mester a bay corta lazonan cu Citgo, centro di crimen Venezolano segun Gobierno Mericano.
Awe ainda mester sigui. Mientras e crisis pa motibo di e herencia di AVP mester wordo soluciona, mientras e crisis di Covid-19 ta wordo sigui pa e Crisis di Prijs di Petroleo, den Parlamento e Era di Vibora ta culmina.
Acusado Benny Sevinger, cu a huramenta ora su detencion den prison a wordo suspende, tabata hari hunto cu su gang politico mientras futuro di un mucha tabata wordo mutila pa sconde e berdad di Benny Sevinger, e berdad di Mike Eman cu a destrui Aruba, e berdad di Paul Croes cu a wordo condena dor di Huez, e berdad di e rapport di Refineria di Aruba, cu ta splica Aruba kico ta lodo.
Chupa voto ta mata futuro di un mucha, cu ta wordo destrui den Parlamento pa motibo politico dor di AVP, cu hasta ora abogado di Benny Sevinger a admiti publicamente cu tin motibo pa Caso Avestruz, a sigui sostene Benny.
Vibora ta canta victoria den Parlamento di Aruba, cu atrobe AVP ta cubri cu berguensa pa no bandona su tradicion manera historia di Aruba ta demostra!
