Economia como productor di placa mester sostene gastonan di futuro - Salud Publico por bira mas selectivo den definicion di cuido necesario - Cuido Medico no por bira peligro pa cuido social y infrastructura di pais
ORANJESTAD(AAN)- Kico ta realmente Cuido Medico y kico realmente ta bini na consideracion ora ta papia di gastonan pa Cuido Medico na un pais?
E uzo eficiente di fondonan cu tin disponibel pa por atende cu hende cu tin problema cu su salud, ta haya un lugar central den planificacion gubernamental rond mundo, cu ta drenta un etapa nobo di Salud Publico.
Covid-19 a acelera cambionan basico cu por a spera riba tereno di Salud Publico, di cual Cuido Medico ta papia di e cuido cu condicionnan medico cu presenta, ta exigi.
Un bon sistema y maneho di Salud Publico (Salud di Pueblo), ta evita cu e gastonan cu e pais mester haci na Cuido Medico, ta alcansa sumanan cu e pais no por paga.
Cuido Medico ta basa riba e loke ta necesario pa duna asistencia na un persona cu tin problema cu su salud na forma directo y mester di entre otro ayudo profesional cu ta dicidi riba tratamento di su malesa.
Na Siglo 20 e avance den Salud Publico a nifica cu Cuido Medico a haya sosten di inventonan y conocemento nobo na forma significante. Na mes momento na paisnan desaroya Pueblo a bira mas exigente cu e Cuido Medico cu e por ricibi pero tambe comunidad tabata mas dispuesto pa duna su aporte na por ehempel aparatonan nobo cu mester a cumpra pa por duna cuido.
Sistemanan nobo pa cubri Cuido Medico tambe a wordo introduci durante Siglo 20 y na Aruba por a mira entrada di entre otro SVb cu sigur a bira importante den industrialisacion y e forma cu peligernan pa salud ta wordo cubri.
Den transcurso di tempo, Cuido Medico a wordo uza tambe pa loke no directamente ta cuido cu hende mester pa motibo di malesa, loke awe ta e problema grandi pa hopi fondo di gobierno, ya cu den seguro priva a tene mas cuenta cu loke realmente ta gasto a base di condicion medico of loke ta wordo presenta como un condicion medico.
E crecemento di poblacion y sigur e hecho cu ciencia mes a haci posibel pa alarga bida di hende tanto pa loke ta trata edad como condicion di salud, a haci cu na cierto momento Cuido Medico a cuminsa haya mas atencion pa awor drenta e fase cu mester defini kico ta considera por ehempel “remedi”, “cuido pa atende y cura un malesa” y cual ta e prioridadnan cu mester introduci.
Covid-19 a trece un demanda nobo paisnan dicidi kico nan ta haci cu Cuido Medico.
Riba e tereno aki ta subi tambe problemanan moral serio. Con mester alarga bida di hende? Kende merece prioridad den Cuido Medico? Te con leu ta bay cu asistencia financiero pa Cuido Medico?
E temporada di Covid-19 ta confronta mundo cu e pregunta con ta dicidi kende ta haya prioridad den cuido.
Na 2020 a cuminsa papia di seleccion di pashentnan den caso cu e pais of instancianan medico no ta capaz pa duna tur cuido den e situacion angustioso di Covid-19.
No ta Aruba so ta atende cu problemanan serio cu awor ta bini dilanti den Salud Publico, cu ta parti di gastonan total di un poblacion cu segun e conceptonan moderno di un comunidad democratico, ta ofrece su ciudadanonan e posibilidad di cuido medico na un base aceptabel.
Gobernacion, sinembargo, ta encarga tambe cu cuido social, mantencion di e base infrastructural di e pais riba tur tereno, sosten di economia entre otro, pues gastonan general di gobernacion cu no por baha.
Tur gasto di un pais ta mara na otro y ta depende di loke economia ta produci tanto na ingreso di Gobierno como produccion priva.
Mundo a drenta un etapa nobo di Cuido Medico. DIARIO ta atende uno di e retonan mas grandi pa futuro cu expertonan local y internacional pero tambe ta inventarisa pensamentonan di publico pa asina sigui informa Aruba di un asunto di cual bienestar di hende ta depende.
