ORANJESTAD (AAN): E aña aki ta bay tuma lugar e di dos edicion di e asina yama Conferencia CreActivo.
Den un entrevista cu vice presidente di Fundacion Go Cultura Edjean Semeleer el a splica cu e ta un conferencia cu a cuminsa aña pasa den e luna di October.
“Nos prome edicion tabata dos dia di tremendo informacion, inspiracion y creatividad, caminda cu nos a trece hunto lidernan local y lidernan di region pa nan por papia di e importancia di formalisa y desaroya e industrianan creativo y e industrianan cultural di Aruba”.
Despues di esaki CreActivo a bira mas un movimento riba nos isla unda cu hendenan den e ambito cultural y politiconan cu tabata presente por a compronde mas miho di kico nos ta papiando, kico ta e vision y dicon nos ta pensa cu Aruba mester diversifica su economia, enfocando riba un sector cu pa hopi tempo caba ta creando bienestar, inspiracion, motivacion y impulsion den economia di Aruba, cu ta e sector cultural y creativo, segun Semeleer.
“Recientemente a anuncia e prome ‘mapping’ di Aruba su industrianan cultural y creativo, cu basicamente ta un investigacion pa colecta data pa haya sa ken nos ta, cuanto nos ta, kico nos ta haci, kico nos tin mester, dicon nos tin impacto y dicon nos ta arquitecto di futuro di Aruba como artistanan y como sernan creativo”, segun Semeleer.
Pa loke ta e di dos Conferencia CreActivo, el a splica cu esaki ta bay tuma lugar na Renaissance Convention Center, unda cu lo tin oradornan internacional, incluyendo Ana Carla Fonseca di Brazil kende ta entre otro un consehero di UNESCO pa loke ta cultura y creatividad.
No solamente e dos dianan di e conferencia e lo ta activo, sino durante full un siman Fonseca lo sinta den sesionnan mas chikito cu sector priva y sector publico, pa splica nan dicon cultura, arte y creatividad ta asina importante pa desaroyo di nos pais.
E dos dianan principal di e conferencia ta bay ta 9 y 10 di October, den Renaissance Convention Center.
