Melva Croes-Yanez, Fundacion Alzheimer:
*E tin un alerta di morto den dje, specialmente si uz’e pa tempo largo
ORANJESTAD (AAN)—Tin adultonan mayor cu ta pasa den un problema grandi, ora cu nan ta sufri di Alzheimer. “E pashent ta wordo obstaculiza pa haya su diagnosis, locual fuera di ta un acto di violacion y falta di etica medico, y di derechonan di pashent, e ta algo di lamenta, y cu ta sosodiendo tambe aki na Aruba”, segun declaracion di señora Melva Croes-Yanez, di Fundacion Alzheimer Aruba.
Croes-Yanez a señala cu maske Aruba no tin ley especifico cu ta exigi e divulgacion inmediato di e diagnostico, tur medico profesional cu ta respeta su mes, su profesion y su pashentnan, tin e responsabilidad di proporciona su pashent informacion riba su estado di salud.
“E consecuencianan di nenga un persona su diagnostico, ta stroba otro profesionalnan cu por aporta na e condicion di e pashent aki, tambe. Otro cos cu ta bin acerca ta, tratamento inapropia. Esey kiermen, cu bo ta duna e pashent sin cu e tin un diagnosis drechi, bo ta dun’e cierto remedinan cu por perhudic’e. Y den pasado, durante di e symposium, nos a yega di papia caba di e asina yama ‘benzodiazepines’, cu nos ta compronde cu tin un preocupacion diripiente di AZV aworaki, cu nos ta bisa: ‘hey’, for di 2018 caba hopi di e benzodiazepines aki, a wordo mira caba como un motibo di alerta cu tin peliger di morto aden. Specialmente, ora cu bo ta mira hopi aki na Aruba, cu ta wordo uza pa largo tempo”, Melva Croes-Yanez a señala.
