For di su penthouse Mike mester presenta un discurso nacional a base di berdad - *Oficina destrui, ekipo horta, economia tranca, rail pa tram, berguensa den Reino - *Falta di respet total pa pueblo pa pone un sospechoso awor detenido riba lista
ORANJESTAD(AAN)—Uno di e preguntanan mas grandi cu Aruba mester haci su mes na vispera di eleccion ta, si Mike Eman lo a presenta su mes atrobe como lider di AVP pa proximo eleccion, si Evelyn no a logra “ruim op” e basura cu el a laga atras como herencia.
Pakico awe Mike Eman no ta tene uno di su famoso discursonan nacional cu placa di AVP, manera den su tempo e tabata haci cu placa di pueblo? Ora mira atras, Mike debe su alma na loke politica na Aruba tin pa ofrece.
E desaster cu Mike Eman a laga atras pa Evelyn Wever-Croes ruim op ta papia pa su mes. Un desaster cu afortunadamente Evelyn a logra ruim op, prome cu pandemia a bati na porta.
Berguensa gobernacion di Mike Eman a laga atras pa Aruba, cu un Ministro condena cu yama Paul Croes y un sospechoso den prison cu ta e back to back di Mike Eman, cu yama Benny Sevinger. Falta di respet total pa Pueblo di Aruba a pone cu awe tin un persona deteni den prison, riba lista di candidato pa Parlamento.
Kico ta moral di Mike y su grupo a bini dilanti for di 2017, ora a destrui e oficinanan cu Pueblo a duna Mike honor di ocupa como Prome Ministro. Berguensa cu Aruba mester a rescata ekipo costoso di Pueblo cu a cay den man di grupo di Mike!
Mike mester tin berguensa di habri su boca cada bes cu e mira e tram pasa riba rails costoso. 1.6 Miljard di Pueblo di Aruba Mike a tira pa compra di tereno, di trabou cu a wordo entrega na companianan.
Te awe Aruba ta manera un campo di bataya despues di guera cu adictonan ta bula den fontein pa baña. Ni cabrito kier bay riba Watty Vos Boulevard, pasobra cabrito no ta come tapijt di hierba oficial cu por dal pega riba windshield di vehiculonan tranca den e fantasia di rotonde y viaduct cu a come placa di Pueblo.
Si esey no ta basta, Mike a haci Aruba ridiculo mundialmente cu e proyecto Citgo, cu a pone Aruba como rehen den man di Nicolas Maduro cu autoridad mundial tabata busca pa criminalidad. Aparentemente ta Nicolas Mike a spera pa yuda paga e debe nacional cu Mike a crea y cu casi a zink e barco Aruba dilanti costa.
Di kico Mike y su grupo ta capaz Aruba a mira sigur mientras hunto cu Evelyn, Aruba a “ruim op” herencia di Mike pa awe sigui cana.
Awe den su Penthouse, Mike mester dal un “ensure” pa celebra e logro mas grandi di su bida, cu ta berguensa nacional!
