Prome Ministro Evelyn Wever-Croes ta dal un buelta fiscal --- *Entrada BBO den reforma belasting ta wordo coregi cu VAT --- *Un sosten pa comercio local den lucha contra competencia online
ORANJESTAD(AAN)—Den tanto suceso y desaroyo den corto tempo na Aruba, uno di e decisionnan mas importante cu Gabinete Wever-Croes a tuma, casi a bay perdi.
E dinamismo di gobernacion den un tempo dramatico pa mundo, sigur ta bini dilanti den e cantidad di desaroyonan positivo cu ta sigui otro.
Uno di e asuntonan cu sigur mester haya atencion, tabata e decision anuncia pa Prome Ministro Evelyn Wever-Croes, cu na 2023 BBO lo wordo reemplasa pa BTW, loke sigur ta honra e deseo di Aruba for di 2007, ora cambionan fiscal a wordo introduci.
Cambio di BBO pa BTW a bira topico di momento pa e simpel rason cu Prome Ministro Wever-Croes a demostra di a comprende kico Aruba tabata pidi for di 2007, ora BBO a bira realidad.
BBO a nace na momento cu e situacion economico mundial a afecta Aruba, cu mester a tume medidanan pa a aumenta su entrada.
Di 2007 pa 2009 mundo a sufri di e “great depression”, cu resultadonan serio pa Aruba tambe.
E sistema fiscal di Aruba mester a wordo reforma y diferente tipo di belasting a conoce reduccion ora a opta pa introduci e belasting indirecto BBO.
E decision pa BBO a cay den mal tera na Aruba pa motibo di e sistema acumulativo.
Manera na varios ocasion DIARIO a trece dilanti, Aruba tabata pidi un tipo di areglo fiscal indirecto, cu tabata comparabel na Sales Tax of BTW.
Sales Tax ta conoci na Merca y BTW na Hulanda y ta sistemanan fiscal indirecto cu entre otro ta haci cu hende ta paga un belasting segun e cantidad di compra cu nan haci.
BTW ta Belasting Toegevoegde Waarde (Value Added Tax), cu ta wordo cobra un solo bes y no cu e cadena di acumulacion cu BBO ta contene.
E decision di gobierno manera anuncia pa Prome Ministro Evelyn Wever-Croes, ta honra loke for di e tempo entre otro gran parti di comercio a trece dilanti, pero tambe tin bentaha importante pa comercio local, cu ta mira problemanan cu na hopi occasion el a trece dilanti, soluciona.
Uno di e problemanan di comercio local ta, e competencia cu ta wordo forma dor di companianan cu ta estableci pafor di Aruba pero ta haci negoshi online sin paga loke comercio local si mester paga.
Esaki tabata loke a bini dilanti di parti di Comercio tambe na 2014, ora mester a tuma decisionnan financiero importante pa Aruba.
Cu e BTW reemplasando BBO, nan problema ta cuminsa haya atencion.
Na mes momento e peso di acumulativo lo desaparece ora e cadena di BBO, BAZV (introduci na inicio di 2018 pa scapa AZV) desaparece.
BTW lo bira realidad na inicio di 2023 loke ta nifica cu 2022 lo bira tempo di preparacion pa e cambio fiscal cu lo deshaci di BBO.
Di e forma aki Gabinete Evelyn Wever-Croes ta entrega Aruba e deseo expresa for di 2007, ora e pais a mustra claramente cu e ta na favor pa introduci un Value Added Tax den e reforma fiscal na inicio di decada 20, den cual a baha diferente tipo di belasting directo pa introduci na Aruba e belasting directo BBO, cu a bira herment politico y inicio di e crisis financiero di Aruba, e debe nacional, ora a deshaci di mita BBO, sin nada pa reemplasa entrada perdi di e pais na 2010.
