ORANJESTAD (AAN): Riba Dialuna 22 di November 2021, e asina yama US Centers for Disease Control and Prevention (CDC)
a haci cambio riba nan Covid-19 Travel Advisory, cu ta un recomendacion pa viaheronan Mericano tene cuenta cune ta cual pais ta safe pa viaha of no durante pandemia.
CDC a baha nan Covid-19 Travel Advisory for di Level 4, pa awor bira “Level 3: Low” pa Aruba, Curaçao, Israel, US Virgin Islands, y Guadeloupe.
Di otro banda, CDC a hisa tanto Alemania como Dinamarca pa ‘Level 4”, y ta conseha Mericanonan di viaha pa e paisnan ey debi cu e cantidad di casonan activo di persona cu Covid.
Siman pasa, paisnan cu a bay riba Level 4 tambe ta Republica Checo, Guernsey, Hungria, y Iceland. Tin un total di 76 pais riba e lista di Level 4 cu ta encera un “Riesgo Halto” di por wordo contagia cu Covid-19 na e paisnan ey, y pesey ta sugeri pa evita di haci viahe. Paisnan grandi cu ta na Level 4 ta e.o. Hulanda, Noruega, Rusia, Suiza, Belgica, Austria, Croacia, Grecia, Irlanda, Turkia, y Reino Uni.
Covid-19 ta sigui subi na Europa, y ta notando un 8% di casonan nobo, y 5% den subida di cantidad di morto, segun e relato mensual di World Health Organization.
Pero awor cu Aruba ta bek na Level 3, sigur e cambionan aki ta bon noticia pa Aruba y Curacao, pasobra e ta bin net na un bon momento pa asina mas hende busca forma pa haci nan viahe pa temporada di Fin di Aña.
