Di e peso di belasting pa cubri gobernacion y gasto operacional
- 2025 ta entrega prueba di cambionan cu ta exigi mas inversion
- Inseguridad mundial ta sigui aumenta e peliger pa haci negoshi
ORANJESTAD (AAN): Progreso y stabilidad di Aruba ta depende segun structura legal di gobernacion di e pais, di e placa ta drenta y sali den caha di Gobierno, pues e maneho financiero y economico di e pais cu mester percura pa bienestar di tur ciudadano riba tur tereno.
Aruba como estado cu ta wordo goberna a base di ley, mester sigui ariba tur tereno loke ley ta exigi pa garantisa bienestar directo di e comunidad Arubano, cu ta cuminsa cu e pan cu ta subi mesa.
Aruba como pais democratico ta diferencia su mes di pais comunista, caminda ta decision di gobierno cu tur poder, ta dicidi kico ta pasa cu Pueblo cada minuut di dia.
E base economico di Aruba, dependiente di comercio liber cu solamente ta depende di ley, mester percura pa produccion financiero pa e pais pero tambe pa un bon calidad di bida pa tur ciudadano.
Esaki ta haci cu comercio liber na Aruba ta e alma di produccion di e pais y encarga cu e tarea pa sirbi economia y asuntonan financiero, cu e forma cu placa ta drenta, ta lora y ta bandona Aruba.
E placa cu ta lora na Aruba, ta parti di e proceso economico di henter mundo, loke ta haci cu Aruba, mescos cu tur otro pais, ta dependiente di loke ta pasa na mundo.
Pues pa vigila e bienestar di e Arubiano, medionan di comunicacion tin e deber pa informa Pueblo debidamente riba e forma cu Florin ta lora na Aruba y kico ta necesario pa e por sigui lora y sirbi bienestar di tur Arubiano.
Pa Florin por lora e mester di e negoshinan y servicionan cu ta produci placa segun leynan cu ta garantiza un aparato special pa asegura e bienestar di comercio na Aruba.
Ora papia di comercio y negoshi pues ta papia segun nos sistema democratico di e posibilidadnan cu e Arubiano tin pa por hiba un bida aceptabel.
Comercio di Aruba ta parti di comercio internacional cu na e momentonan aki sigur, conoce diferente punto di presion den e panorama mundial di cambionan grandi cu ta bira realidad, manera DIARIO semper a splica Aruba cu luho di detaye.
Pa midi pasonan di prevencion pa cuida Florin y e forma cu despues di 2024 cu Aruba a logra su prome saldo positivo atrobe ariba su entrada y gastonan, mester sigur vigila e capacidad di comercio di Aruba pa sigui lora manera e ta lora actualmente.
Pa midi capacidad mester tin un cuadro cu ta refleha kico Aruba mester ariba tereno economico pa garantisa un bon realidad social, pues bienestar basico di tur Arubiano.
E cuadro aki ta sumamente importante pa Aruba den totalidad economico mundial, cu cantidad di riesgonan y peligernan nobo, cu no ta den man di Aruba pero di loke ta pasa na otro paisnan di cual Aruba ta depende.
Aruba den e situacion mundial mester tin un contesta claro pa e exigencianan mundial, den cual ta central e forma cu Inteligencia Artificial ta cambia exigencianan pa por participa na economia, pues tambe na comercio internacional y trabou cu economia ta produci.
Mester crea espacio fiscal awor pa sigui amplia fundeshi economico di Aruba cu ta comercio local, cu ya mester a adapta su mes y tur trahador den e proceso laboral di economia, na medidanan cu mester a introduci pa cuida Florin den un mundo maneha pa Inteligencia Artificial y cambio continuo.
Na nivel nacional awor mester atende cu e gastonan pa Florin por lora na Aruba, a base di e produccion nacional di comercio y trahadornan.
Mester tene cuenta cu haci negoshi na Aruba tin su parti di clima por ehempel y e situacion strategico comercial riba mapa.
Di otro banda produccion economico ta wordo afecta dor di necesidad di importacion di un parti grandi di loke ta necesario pa comercio y trahador por funciona. Esaki pues ta un peso riba balanza comercial cu mester produci placa pa paga aparato gubernamental.
Con ta bay sostene e upgrading continuo y intenso di tanto e doñonan como e trahadornan cu ta e pilarnan cu ta sostene entrada di Gobierno?
Parlamento tin un deber fiho na e momentonan aki. Cambionan grandi ta exigi mas inversion di companianan cu mester cuida interes di e trahador tambe. Con haci e cambionan aki si den cifranan di Gobierno no sigui baha e gastonan di Gobierno pa asina alivia e peso di belasting?
Esaki ta e exigencia di bon gobernacion basa riba e Ley di Contabilidad cu Parlamento tin e deber di vigila.
Cu regreso di Parlamento di vacacion, e acento mester ta riba e forma cu ta atende cu e costo pa haci negoshi, den cual entrada di e trahadornan ta inclui como garantia.
Mester contesta e pregunta con ta sigui baha gastonan di gobernacion pa asina por trece alivio fiscal pa e comerciante y e trahador, cu ta aumenta actualmente den cantidad y asina produci mas placa den caha di Gobierno, pa motibo di e resultadonan comercial cu ta logro di inversion di comerciante y bon trabou di e trahador, cu mester sigui inverti den capital pa compania y exigencianan nobo di conocemento pa trahador den un mundo cu ta exigi cada dia mihor preparacion pa por funciona na e nivel necesario pa por cubri costo di gastonan pa haci negoshi cu ta mara na inseguridad internacional y adaptacion continuo na e Era di Inteligencia Artificial.
