Segun cifranan di 2024:
ORANJESTAD (AAN): Directora di DIMAS, Kathy Paskel, a duna di conoce cu DIMAS tin un partner hopi importante y esey ta Warda Nos Costa. El a bisa cu Warda Nos Costa tin acceso na nan sistema y por wak cua peticionnan ta den proceso, cua a wordo entrega na tempo. E informacion ta na nan disposicion na momento cu nan topa cu personanan cu mester mustra cu nan tin un estadia legal na Aruba.
Paskel a sigui bisa cu e nacionalidad cu DIMAS tin mas den demanda pa peticion di permiso ta colombiano sigui pa venezolano, hulandes (cu mester permiso pa e prome 5 añanan), dominicano y haitiano.
Durante aña 2024 a haya peticion di rond 80 nacionalidad cu ta pidi un permiso na Aruba. Ta papia di un comunidad diverso cu ta bin pa aporta na nos economia of como famia di esunnan cu ta den e sector laboral, e director di DIMAS a indica.
DIMAS ta constata cu hopi di e peticionnan ta wordo entrega incompleto locual ta conduci na un tardansa. Ta hopi importante pa e usuario tin un email y cu esaki ta esun cu nan a pone den e aplicacion. DIMAS ta comunica tur nan decisionnan via email, na e email cu e persona a pone den e aplicacion, el a remarca.
Na 2024, DIMAS a introduci un 'Validation App' y esaki ta pa tur institucion pa uza cu e cliente por mustra cu e ta legal, cu e ta cliente di DIMAS y e ta haya un PIN pa medio di su email personal.
Esaki ta pasonan cu DIMAS ta tumando pa cu e organisacionnan gubernamental, pero tambe institutonan. Banconan, hendenan cu ta huur cas, tur kier sa si e documentonan cu ta wordo presenta na nan ta corecto y valido.
DIMAS a lansa e App y e ta trahando y kier pa e clientenan compronde tambe cu ta na nan beneficio pa tin nan email na ordo pasobra nan por wordo pidi no solamente pa Warda Nos Costa, pero por ehempel pa Censo, cu tambe tin acceso na e sistema di DIMAS, pero cu ta pone e responsabilidad na e cliente pa demostra esaki via di e 'validation app'. A pasa caba cu hendenan a presenta permisonan falso, Kathy Paskel a indica.
