Andres Geerman, di Management Team Colegio EPI:
ORANJESTAD (AAN) – Aña pasa, na Augustus, Gobierno di Hulanda a pone placa, cu nan yama “SIA Plus”, den e “Vierlanden overeenkomst” pa Colegio EPI haci intercambio di studiantenan.
Den entrevista cu DIARIO, señor Andres Geerman, di Management Team a bisa cu MBO tambe a cay aden, ya cu prome tabata pa Universidad su HBOnan.
Pues, Colegio EPI a haya chens y na prome lugar a manda un studiante na Den Haag, cu a caba mientras tanto, y aworaki tin 11 mas cu a bay siman pasa y cu ta na Hulanda, unda nan ta coriendo nan stage, pa tres of cuater luna, y eynan tambe nan ta siña di e bida ayanan, segun señor Geerman.
Nan ta studiantenan di tur unidad di Colegio EPI: a bay 5 di cushina, 3 di hotel, 1 di Nursing y 2 ICT na Amsterdam, kiermen di tur unit y nan ta reparti na Hulanda.
Señor Geerman a indica como un Beroep Onderwijs, nan ta habri oportunidadnan pa e studiantenan aki bay traha cu companianan grandi pa haya experiencia. El a subraya cu e fondonan aki ta pa muchanan bira mas conciente tambe di kico tin na Aruba mes, y cu nos studiantenan ta hopi bon prepara. El a agrega cu tin dos studiante na Belgica pero nan ta apart. Nan tey cu fondonan di Erasmus.
Señor Geerman a señala tambe cu Colegio EPI tin basta meta pa aña 2025, pa sigui yuda e studiantenan, y pa e tres añanan nos dilanti, tin hopi desaroyo di estudio pa e hobennan.
