Un pagina nobo a habri den e relacionnan entre Aruba y Reino -- *Cuatro homber completamente distinto a hunga e papel mayor --- *Di abogado di Concenso Jan De Koning pa e Orthodox Raymond Knops
ORANJESTAD (AAN) — Den tur trankilidad y silencio, Gobierno di Aruba ta traha riba e prome exigencianan di e gobernacion 2021-2025.
E proximo eleccion na 2025 lo tuma lugar na un momento cu segun planificacion mundial, decisivo pa e rumbo cu definitivamente mundo lo tuma guia pa un generacion nobo pero tambe den un situacion economico internacional den cual poder economico internacional por conoce cambio.
Covid-19 a duna prueba cu ora planifica, mester mantene na bista cu loke nunca a spera, por socede.
Na momento cu Aruba drenta temporada di eleccion 2025, Aruba ya lo a wordo someti na cambionan cu na e momento lo hiba Aruba na porta di e futuro nobo, cu hunto cu Hulanda, Aruba a acorda pa contrui.
Hunto cu Hulanda, Aruba mester bolbe duna contenido na su autonomia, estatal cu ta depende di su autonomia social, financiero, economico.
Awe nos kier analisa e forma cu Aruba a alcansa su autonomia na 1983 na Hulanda.
Aruba tabata tin un lider Betico Croes, cu a duna contenido na determinacion. Un rumbo el a sigui, sin hala atras.
Na e momento culminante den e lucha di Aruba, Jan de Koning ta bira Ministro Hulandes encarga cu asuntonan Antiano.
E influencia di caracter di cada participante na gobierno y na historia di un pais, mester ta parti di analisis pa e simpel hecho cu e caracter di Jan de Koning a conduci Aruba na e momento decisivo.
Jan de Koning tabata conoci como persona cu tabata busca “concenso” y acuerdonan pa yega na solucion.
Un personalidad diferente ta topa despues den persona di Ernst Hirsch Balin, cu ta wordo recorda pa e temporada despues di Status Aparte di Aruba, cu manera tur hende por a spera, lo tabata tin impacto riba Antia Hulandes.
Plan Hirsch Balin a presenta un plan pa simpelmente parti loke a resta di Antia Hulandes na dos dor di uni Curacao cu Bonaire y haci Isla Ariba un solo pais.
El a fracasa pero e tabata tin mester di basta atencion tambe pa e Aruba autonomo na inicio di Status Aparte, cu sigur despues di tempo mester haya mas atencion pasobra e ta duna prueba di un recuperacion economico despues di 1986, cu a bira un tormenta pa Aruba, cu sin control di Reino lo a confronta problema sumamente grandi.
Ronald Plasterk sigur mester wordo menciona ora ta papia di e Ministro Hulandes cu ta percura pa Statuut wordo mantene den gobernacion na Hulanda y na teritorio Hulandes den Caribe.
E caracter di Ronald Plasterk tabata uno di un persona cu conoce ley y ta actua na forma dirigi pa haci loke mester haci.
Dos decision di Ronald Plasterk ta marca historia di Aruba. Na prome luga, e hecho cu Status Aparte a stop di existi ora Ronald Plasterk a baha Mike Eman for di Fort Zoutman y a impone supervision financierpo riba Aruba, cu tabata casi bancarota.
E segundo decision di Plasterk cu a marca historia ta, cu pa prome bez den Reino for di momento cu a introduci e regla cu paisnan den Reino tin oportuninidad pa presenta candidatonan pa Gobernador, cu Plasterk a pone su mes contra candidatonan presenta pa Prome Ministro Mike Eman y finalmente a deshaci di opinion di Mike Eman y a nombra e candidato cu Reino por a sostene.
Plasterk a keda conoci pa su caracter firme den su trabou y a wordo sigui pa Raymond Knops, cu a keda cu e trabou mas dificil for di momento cu Reino y Aruba a yega na un acuerdo pa Status Aparte.
Tabata Raymond Knops cu mester a traha cu Aruba riba recuperacion di e Status Aparte di Aruba, cu a bay perdi dor di crisis financiero cu Mike Eman a laga atras.
Ora ya a yega na un areglo y Aruba tabata cla pa presenta su prome cifranan solido, Covid-19 a presenta.
Reino y Aruba mester a yega na un acuerdo nobo pa reconstrui Aruba autonomo, cu ta basa riba autonomia financiero social y economico pa e por sostene autonomia social y estatal.
Raymond Knops lo drenta historia di e Ministro “Orthodox” manera el a yama su maneho cu a exigi cambio pa Aruba pa asina garanrisa un futuro di Aruba cu for di 2017 tabata bancarota.
Hulanda tin problema pa forma un gobierno. Pero manera Knops ya a trece dilanti, su hora di bay a yega.
1983-2021: realisacion di Status Aparte y awe Rescate di Status Aparte den cual directamente e posicion di Reino y sigur di e Ministro encarga cu Relacionnan den Reino tabata central.
En espera di e nomber di e representnte di Reino den e recuperacion di Status Aparte, nos ta mira atras pa nos por sigui cana.
