ORANJESTAD (AAN): Recientemente prensa a puntra director di Santa Rosa Nathalie Maduro tocante un situacion cu tin na e dam di Rooi Afo, unda cu lo tin un negoshi cu ta saca awa constantemente for di e dam.
“En berdad nos tambe a tuma nota di esey y mi tin cu cuminza na bisa cu na momento cu e persona a yama pa un solucion, e contesta cu el a haya sigur no tabata e contesta cu e tabata kier”.
Mi mes a tuma contacto cu señor Pedro Ramirez kende ta e cunukero cu ta haci uso di e pomp pa saca awa for di e dam, mi a splike di e situacion y eingelijk e resultado tabata hopi positivo, segun Maduro.
El a splica cu el a papia tambe cu Ady Croes kende a papia den nomber di e otro cunukeronan.
Segun e director di Santa Rosa, banda di e hecho cu Ramirez tin un negoshi, e tambe ta planta.
Santa Rosa a recomenda na Ramirez pa e no depende full riba e awa di dam.
“Actualmente nos di Santa Rosa ta yuda cunukeronan y como cu e ta produci comercialmente, e ta bin na remarke pa e prijs special di awa cu WEB ta ofrece”.
Ma splike tambe cu e no por depende constantemente riba e awa di dam, pasobra ora cu awa no yobe y no tin awa, ta mihor pa e tin e meter di WEB, unda cu e ta haya un prijs special como persona cu ta produci comercialmente, segun Maduro.
El sigui bisa cu el a splica Croes cu ningun cunukero chikito ta wordo para di saca awa for di dam.
“E damnan ta wordo cera cu piedra y algun aña pasa nos mes a pone heronan, pa ora cu e awa den dam baha bao di cierto nivel, nos mesun trucknan no ta saca awa mas for di e dam”.
Motibo ta entre otro cu fauna (pahranan) ta haci uso di e awa y ta importante pa tene suelo di cierto area di bo isla humedo, segun Maduro.
E director di Santa Rosa a indica cu e intencion ta pa pronto sinta na mesa cu Croes y Ramirez, pa saca un balor agrega for di un situacion negativo.
“Ami sigur como director di Santa Rosa tin hopi aña ta purba concientiza e productornan pa traha na un manera mas uni, pasobra union ta haci forza”, segun Maduro.
