Director di Compania Arubano di Petroleo Jeremy Croes:
“Nos ta sumamente contento cu e logro aki”
ORANJESTAD (AAN): Señor Jeremy Croes, director di Compania Arubano di Petroleo a expresa, despues di e ceremonia di firmamento, cu e ta sumamente contento cu Gobierno di Aruba a yega na un contrato entre Compania Arubano di Petroleo (CAP) cu Andicuri Oil & Gas Exploration VBA (AOGX), cu ta un subsidiario local di Armstrong International LLC (AI).
Señor Croes a expresa cu e momento aki ta uno hopi special, y cu CAP ta hopi entusiasma pa cuminsa e etapa nobo aki cu Andicuri Oil & Gas, pa loke ta exploracion, desaroyo y produccion di hidrocarburonan den e area maritimo di Aruba. El a splica cu e team tras di Armstrong ta un team hopi conoci pa descubri y explora den areanan cu nan ta yama "frontiers areas", cu ta areanan no mucho conoci, y esaki ta permiti nos soña un poco, y duna nos e speranza di por logra haya algo.
Cu e acuerdo firma, e trabaonan por cuminsa. E compania lo cuminsa cu e exploracion, teniendo na cuenta cu e medio ambiente, y tur e normanan social, den colaboracion y bon comunicacion cu "stakeholders" local. Den e prome fase, Andicuri Oil & Gas lo cuminsa analisa mas data, cual lo por tin un duracion di maximo 2 aña. Unabes e analisis aki ta aden, lo por sigui pa e siguiente fase. Cu resultado positivo, Aruba lo drenta den e siguiente fase cu lo por dura un maximo di tres aña.
"E ta un momento hopi grandi, cu ta tuma hopi inversion. No ta asina facil bo ta haya un compania cu ta dispuesto pa bin inverti asina hopi di nan tempo y energia pa purba descubri gas y/of petroleo na Aruba. Specialmente cu ya den pasado e compania Repsol a bin explora e areanan maritimo di Aruba, sin haya nada. P'esey nos ta sumamente contento cu e logro aki", Señor Croes a expresa.
