Gino Frans di Stichting Eliezer ta indica:
ORANJESTAD (AAN) – E situacion di adictonan ambulante, cu specialmente anochi ta cana den diferente punto di e ciudad, ta alarmante. Gino Frans, di Stichting Eliezer a confirma esaki den entrevista cu DIARIO.
“E situacion ta hopi alarmante y fastioso. Nos ta mir’e tambe y di cerca. Nos ta kere cu awo cu Stichting Hunto ta bay habri su portanan y cu nan tin un maneho nobo, y tambe trahadornan nobo full fresco, nan ta bay haci un cambio, mi ta kere, hunto cu nos” Gino Frans a menciona.
“E meta ta cu nan ta bay tuma tanto hende, anto e lugar ta cla. E ta masha bunita mes, pariba. E intencion ta cu tin persona cu ta wordo selecta. Nan ta bay rigi p’ariba, ta bay tin un ‘detox room’ caminda e adictonan ta bay keda aden cera, pasobra tin hende cu no por keda akinan. Nan ta sali bay laga bo. Nos ta coi nan, hinca nan pariba, despues nan ta wordo selecta. Anto tin di nan ta bay bin cerca mi, y otro instancia cu ta bay traha hunto cu nos”, Gino Frans a duna di conoce.
Gino Frans a agrega cu nan ta bezig tambe cu director di OC (Centro Orthopedagogico), y e meta ta cu nan tin un programa pendiente tambe eynan. “Pero tur cos ta placa. Nos tin cu wak esey manera cu ta, bo mester paga trahado, mester prepara p’e”, Frans a comenta.
El a añadi cu su yiu ta trahando cu ne y e tin hopi bon experiencia cu e hobennan cu ta cay den adiccion, y e tin bon contacto cu OC. “Nos tin un mucha homber di OC cu a draai un programa cu nos. Simplemente el a bin bishita nos yuda nos cu e clientenan, awo e tin un job cu nos, eynan nos tin un caminda di cana. OC a haye asina bunita, hopi special mes. Tambe nos tin un samenwerking cu nos, nan a trece e hendenan akinan pa nos, nan ta pasa e dia aki y nan ta hiba nan atardi bek. Nos tin un bon comunicacion y esey ta bay crece tambe”, Gino Frans a señala.
El a comenta tambe cu nan tin un tereno cu a wordo otorga na nos, y nan ta bezig cu ne pa nos haya un pida cu ta bira erfpacht, pa nos por contrui riba dje. Eyriba ta bay bin algo pa hoben. Asina señor Gino Frans a informa. “Pues tin algo na caminda, tin algo ta broei y mi ta kere e ta bay bira miho, miho y miho”, el a remarca.
