E bista riba lama di Aruba ta celestial, espectacular, fabuloso y romantico!

ORANJESTAD (AAN) – Algo masha agradabel mes, cu Matutino DIARIO a experiencia, recientemente,

ta acerca un par di turista cu a caba di yega Aruba abordo di crusero, y ta saliendo di e waf pa subi e caminda comercial, anto puntra nan, nan impresion ora nan baha na waf.

E ta bunita pa scucha cu nan ta satisfecho cu e atencion ricibi, cu nan ta hopi bon organiza, y esey ta haci cu e fluho di turistanan ta move lihe.

Pero principalmente, e bisa cu nan ta haya nan dilanti di nos lama, espectacular y fabuloso, cu su color blauw scur, cu tononan blauw cla, y diferente franha color berde. Un dama turista di Argentina, a describi esaki: “Lama di Aruba ta celestial, cu solamente para un rato keto, keda admir’e bo ta sinti su energia, bo ta scucha e olanan cu nan mensahe romantico, y mi ta hopi contento di ta akinan”.

Diaranzon cu a pasa a bishita Aruba un di e cruseronan di mas grandi di mundo, cu ta Oasis of The Seas, cu tabata mara riba e Pier I (India), tambe Carnival Bista cu a mara na Pier B (Brabo), y Rhapsody of the Seas cu a mara na Pier C (Pier Charlie) E tres barconan aki a aporta un cantidad inmenso di bishitantenan pa nos Isla, y bon parti di nan a yena e busnan di Arubus pa bay goza di nos beachnan y lama, mientras cu otronan a disfruta di un trip abordo di nos servicio di tourbus. Bendito Dios cu nos bishitantenan por sinti nan mes sigur y trankil na Aruba, cu ta algo cu sigur no tin prijs pa paga p’e. 

ESPEHISMO SUPERIOR:

Algo cu a crea spectativa cerca algun ciudadano local, ta e hecho cu mientras e cruseronan ta mara na waf, por mira nan na cierto distancia for di e waf, comosifuera nan ta den dos diferente lugar na mesun momento. Pero esaki no ta real.

Den e mundo di nautical esaki ta un fenomeno optico yama “Espehismo Superior” of tambe “Fata Morgana”. Esaki ta sosode pa motivo di e inversion di e temperatura den e atmosfera, na un capa di aire calido ta haya su mes riba un capa di aire frio, locual ta causa cu refraccion di e luz.

Den e caso di un espehismo superior, un obheto, manera un barco, ta dobla su mes pabao, y ta crea e ilusion cu e barco ta na mas distancia di cual realmente e ta, of hasta por mir’e manera e ta flota den aire.

Matutino DIARIO mes tabata hopi curioso pa haya sa di con nos por mira un crusero comosifuera e ta mara tegenover di Unicon, na Smith Boulevard, mientras cu realmente e ta mara na waf. Nos a yega di puntra algun persona cu ta traha den e area, y algun peaton riba Smith Boulevard, cu a haya straño nos pregunta “unda e ta kere cu e barco nos dilanti ta mara?” y tur a bisa eynan mes! Pero esaki no ta real, ta simplemente e fenomeno di espehismo superior manera a splica akinan.

Masha danki na e experto den nautical cu a brinda nos e informacion aki, y pa yuda nos cu algun potret. (Compila pa M. Monge)