ORANJESTAD (AAN) — Kico AVP, Melvin Tromp of Pik Pisas a aspira ora Pisas den tempo di eleccion a bin brasa Melvin Tromp na Aruba, no ta conoci.
Hecho ta cu den un tempo basta turbulento na Curacao y na Aruba y sigur den Reino Hulandes, Pik Pisas a dicidi cu e ta laga formacion di un posibel gabinete Pisas na Curacao atras, pa den tempo di campaña politico e bin brasa su amigo Melvin Tromp.
Un eror protocolar internacional a wordo comete dor di Pik Pisas, cu ta considera su mes cu tur rason como e posibel futuro Prome Ministro di Curacao. Ta hustamente e hecho cu el a laga e formacion di Gabinete Pisas atras na Curacao pa bini Aruba den tanto turbulencia politico, ta causante di problema.
Hasta den un tempo sin problema politico na ningun di e paisnan den Reino, no ta normal cu a wordo spera cu Pik Pisas por subi avion y bini Aruba cu e speransa cu e lo wordo ricibi pa Prome Ministro di e pais.
DIARIO, na haltura di e basenan estricto di relacionnan den Reino y tambe reglanan protocolar mundial, a acumula tur aspecto di e bishita di Pisas, cu a resalta pa diferente motibo.
Na prome luga Pisas mes, cu na e momentonan aki sigur ta hunga un papel importante den formacion di un gobierno na Curacao caminda e lo por bira Prome Ministro.
No ta spera cu e figura principal pa un futuro gobierno di un pais, tuma un vacacion na e momento. Ta na Pik Pisas pa dicidi ki ora e ta subi avion, rumbo e pais cu e kier, cu e ta bishita como hende y no como politico of (futuro) gobernante).
Pues un abraso di Melvin Tromp tabata tan importante, e mester a yega Aruba, brasa Melvin Tromp y tur cu e kier a brasa, sin menciona cu e tin intencion di papia cu Gobierno di Aruba tambe.
Ta Pik Pisas a duna di conoce, ora e tabata brasa miembronan di oposicion cerca di un vehiculo cu un bandera grandi di AVP, cu e tabata tin intencion di topa cu Gobierno di Aruba.
Aki nos mester para keto.
Pik Pisas como supuesto futuro Prome Ministro di Curacao, mester tabata na haltura cu su bishita na Aruba no mester a drenta publicidad si e kier a keda leu di politica, manera protocol di Reino ta exigi.
No ta wordo considera aceptabel cu gobernante di otro pais den Reino ta mete den situacion politico na otro pais den Reino. E bishita di Pik Pisas claramente tabata un sosten pa AVP y a bira un metemento den politica di Aruba ora el a bisa cu e tin intencion di bistita na Gobierno, sin cu e tabata tin un cita.
Pues e eror a wordo comete dor di Pik Pisas cu a permiti partido AVP uza su persona pa haya voto.
Awor kico tur hende tabata spera? Cu Gobierno di Aruba ta sinta vigila kico AVP ta haci of no ta haci na luga di goberna?
Hasta si Prome Ministro Wever-Croes a tende cu Pik Pisas ta brasa Melvin Tromp na aeropuerto, kico e mester a haci?
Con Prome Ministro Wever-Croes por a ricibi Pik Pisas oficialmente como supuesto futuro Prome Ministro di Curacao, pues den un funcion cu ainda Pik Pisas no ta ocupa? Di kico nan mester a papia?
Di nan relacionnan den Reino di cual ainda Pik Pisas no tabata participante? Di problemanan cu Curacao tin riba tereno politico of cu Aruba tin den tempo di eleccion?
Pik Pisas a bin sirbi proposito di AVP na Aruba. Ta tristo cu el a presta su mes pa wordo uza door di un partido manera AVP, cu ta maestro den wega politico y manipulacion di hende y regla.
