E biaha aki interes pa forma grupo di mucha muher pa SVT tabata mucho abao

Jessy Ras, coordinador, ta splica:

ORANJESTAD (AAN) – Jessy Ras, Coordinador di e Trayecto di Formacion Social (SVT), a comenta den entrevista cu DIARIO, cu lamentablemente e biaha aki no tin mucho interes bao mucha muher pa drenta den e trayecto.

            P'esey nan a centraliza den e muchanan homber, pa e inscripcion cu tin actualmente. Ora cu nan a haci e registracion no tabata tin suficiente mucha muher, siendo cu mester minimo 10 hoben pa nan inicia un grupo. Esey sin conta cu ainda tin e parti di seleccion cu mester tuma lugar.

            Ta lastima cu tin mayor ta laga atras nomber di nan yiu pa nan participa, pero ora di yega e punto cu mester haci afspraak cu nan, toch nan a  bay over y ta dicidi pa sigui scol, of nan a haya trabao, locual pa e hobennan ta positivo.

            Ras a bisa cu SVT no ta descurasha y nan ta pase pa otro aña, 2025, pa wak si na luga di cuminza cu un grupo di mucha homber na maart nan lo cuminza cu un grupo di mucha muher.