Na 2014 Putin a anexa Crimea y a enfrenta menasa di guera nuclear --- *Crisis mundial awe ta entrega prueba di peliger cu Aruba a confronta --- *Na 2016 economia di Aruba a wordo entrega na Maduro y Putin
ORANJESTAD (AAN) — “E yabi di refineria di Aruba ta den man di Aruba atrobe”.
Cu e anuncio aki, Prome Ministro Evelyn Wever-Croes a informa Aruba cu el a deshaci di condicion di Aruba como rehen economico di Citgo y a habri porta pa cuminsa atende cu posibilidadnan realistico pa refineria di Aruba.
Su declaracion a wordo oficialmente confirma dor di Citgo y DIARIO a presenta na Aruba e anuncio oficial di Citgo na Merca dia 11 di October 2019.
Di e forma aki un bataya historico di DIARIO a yega na su conclusion, ora Prome Ministro Wever-Croes na nomber di Aruba a deshaci di un proyecto cu na 2016 a bira motibo di hubilo pa Aruba.
Uno di e decisionnan politico mas pisa den historia di Aruba a wordo tuma ora Prome Ministro Evelyn Wever-Croes a deshaci di acuerdo legal cu cual ex Prome Ministro Mike Eman a mara Aruba na Citgo, cu segun Gobierno di Mike Eman lo a nifica un crecemento economico di 15 porciento pa Aruba.
Berdad y realidad importante di Citgo a keda scondi na Pueblo di Aruba na 2016, ora cu e Acuerdo di Citgo economia di Aruba a wordo entrega na Maduro y Putin na momento cu Aruba tabata den un situacion financiero desastroso.
Tres aspecto sumamente importante a hunga un papel den investigacionnan di DIARIO cu na 2018 a anuncia na Aruba, cu Citgo tabata un aventura sumamente peligroso pa Aruba.
Cu sosten di fuentenan internacional y local, DIARIO na prome lugar a investiga Citgo, cu tabata e baca di lechi di Nicolas Maduro cu tabata saca tur placa for di e operacionnan di Citgo, e propiedad di PDVSA na Merca cu Hugo Chavez kier a bende pero cu Maduro tabata uza pa saca placa y otro motibo segun acusacionnan serio di autoridad Mericano.
Na momento cu Aruba a firma e contracto cu Citgo, tanto Nicolas Maduro como cabezantenan di Citgo tabata wordo investiga y ya persigui dor di autoridad na Merca pa actonan criminal, cu a hiba funcionarionan halto di Citgo ya dilanti Huez.
Na segun lugar, Citgo realmente no tabata di Venezuela pero tabata funciona como borg pa placa cu Venezuela debe companianan cu tabata tin asina 51 porciento di e accionnan di Citgo, mientras Rusia tabata tin 49 porciento di e accionnan debi na prestamonan.
E tercer punto tabata cu Nicolas Maduro no tabata tin e 300 Miyon cu el a bisa cu e lo pone riba mesa.
Aruba for di 2017 tabata den un situacion sumamente peligroso.
E grupo di Nicolas Maduro no por a keda Merca, cu a tuma medida contra Gobierno di Nicolas Maduro y Aruba a bira centro di e grupo di Citgo cu figuranan sumamente peligroso, busca dor di autoridad na diferente pais.
Nelson Martinez cu tabata tin un relacion sumamente estrecho cu Gobierno Mike Eman, a resulta den prizon pero ta wordo menciona den documentonan di Corte di Merca den investigacionnan penal cu tabata tuma lugar.
Asdrubal Chavez mester a bandona Merca y a trata di establece su mes na Aruba, cu Nicolas Maduro kier a uza como su centro nobo.
Den e tempo aki e situacion financiero di Venezuela, a haci Venezuela rehen di Rusia, cu tabata defende su interesnan den Citgo dilanti Corte Mericano ora Husticia na Merca tabata persigui cabezantenan di Citgo.
Venezuela a bira centro di poder di Rusia, cu for di 2014 tabata den conflicto abierto cu mundo cu a pone sanccionnan pisa riba Rusia, cu a anexa Crimea den un situacion mundial, den cual Rusia a mustra cu e no ta hala atras pa e peliger di un guera nuclear, mescos cu awe ta e caso.
E proyecto Citgo na 2016 a entrega Aruba na poder di Venezuela y Rusia pero tambe a haci Aruba rehen directo di Nicolas Maduro, cu a deshaci di democracia y a hinca Venezuela directamente den un conflicto mundial ora el a nenga di acepta resultado di eleccion y Guaido a bira Presidente electo.
Ta den e crisis cu a surgi porfin Asdrubal Chavez mester a bisa cu Citgo no por a honra su contracto cu Aruba.
DIARIO a sostene Prome Ministro Evelyn Wever-Croes completamente ora el a exigi Citgo debolbe Aruba e yabinan di e refineria di Aruba, loke a nifica cu na e momento Aruba definitivamente di ta rehen economico awe di Venezuela y Rusia cu por a duna Venezuela e placa cu e tabata tin mester pa haya control economico di Aruba.
Awe DIARIO ta entrega prueba di cumplimento cu e deber sagrado di periorismo pa lanta para contra tur menasa pa bienestar di e pais, aunke e menasa ta disfraza cu promesanan falso.
