Represion ta unico arma pa dictador cu ta subi caminda sin salida --- *Flirteo economico cu dictadura ta stroba lucha pa democracia --- *Stef Blok kier a habri frontera entre Aruba y peligro Venezolano
ORANJESTAD (AAN) — E crisis di Ukraine tin resultadonan horibel pa e pais y a ocasiona un shock pa mundo, cu no tabata prepara pa mira un realidad cu mundo kier tene scondi pa basta tempo.
Tin varios motibo cu e suceso ta haya atencion mundial, cu otro paisnan cu ta victima di situacionnan similar, no ta ricibi di mundo.
E prome motibo sin duda ta, cu ta trata di un poder mundial, cu por hiba mundo na un guera mundial, cu a invadi otro pais.
Loke ta pasa na Rusia no ta nada excepcional na mundo, cu ta bay contra su propio medidanan.
Den Reina y na Aruba, tin un prueba grandi cu ta splica pakico te ainda, mundo no por lanta para contra dictadura.
E romance entre mundo y comunismo y otro tipo di dictadura peligroso, ta presenta su mes continuamente.
Den porta di Aruba, Nicolas Maduro a trapa riba democracia y a crea un imperio Comunista cu ta peligro pa henter e region.
Na 2018, ora Nicolas Maduro cu economicamente a destrui Venezuela, a deshaci di democracia pa e keda na poder, mundo a tuma cantidad di medida y te awe tin dos Presidente di Venezuela aunke uno tin palacio y e otro, Guaido, tin mas chens di resulta den prison cu den Palacio Miraflores.
E compromiso cu mundo liber ta cera cu dictadura ta e sosten grandi cu ta haci dictadura posibel.
E ehempel di loke a pasa na Aruba, ta mustra riba loke awe ta pasa na Rusia, cu ya tabata conoce sancion contra loke el a haci na 2014. Pero den tur sancion, e por a keda negocia cu paisnan y mantene lazonan comercial cu mundo liber.
Kico lo a pasa si na 2014 a tuma sancion berdadero cu lo a evita tambe cu placa di Rusia lo a sigui crea desasternan cu tanto pais conoce?
Pa bolbe na Aruba. E Ministro di Defensa di Reino, Stef Blok a bini Aruba pa mustra riba e posibilidadnan pa Aruba reanima su posibilidadnan economico cu Venezuela.
E Ministro hasta a bisa Aruba y Curacao cu nan mester a habri nan frontera cu Venezuela.
Prome Ministro Evelyn Wever-Croes a bisa cu no y cu Aruba lo a wordo perhudica si habri porta sin cu Aruba por a keda riba pia cu e resultadonan.
E actitud di Stef Blok a wordo cuestiona na Hulanda mes, ya cu como pais di Union Europeo, cu medida contra Venezuela, el a actua manera el a haci.
Awe den un crisis mundial, den cual mundo comunista ta enfrenta mundo liber, Venezuela, Cuba y Nicaragua a declara nan mes aliado di Rusia, cu ta nifica aliado di morto di tur victima den e lucha cu a bira sangriente na Ukraine.
Cantidad di negoshi di mundo liber, ta sostene economia di Cuba y tambe di Nicaragua.
Kico ta sancion? Kico ta balor di hende, di seguridad nacional, den un mundo caminda comercio entre paisnan Comunista y liber ta sigui como nada ta pasa?
Na Europa, e parti Hulandes Europeo di Reino ta uni na guera sosten di Ukraine y ta aporta awor cu arma.
Dilanti di costa di Aruba, Nicolas Maduro a sobrevivi tur critica y accion contra su dictadura y ta sigui dicidi kico ta pasa.
Mundo ta spera cu su menasa lo pone un fin na regimen di Vladimir Putin. Mundo ta lubida cu un dictador na un pais cu mas cu un siglo a sigui un sistema di indoctrinacion di su pueblo, no por baha sin mas.
Vladimir Putin y tur dictador ta keda na poder pa medio di opresion, manera a keda demostrana Cuba cu algun dia pasa a sentencia personanan cu kier a protesta contra comunismo, cu decadanan den prison.
Na e momento cu e dictador stop di abusa di hende, e mester bandona e pais si e kier keda bibo. Pasobra na momento cu e floha, su bida ta na peliger.
Ta pesey ta regla salida di dictadornan pa asina debolbe libertad na pueblonan cu a bira victima di e sosten cu regimennan dictatorial ta haya riba tereno comercial mundial, manera den e crisis di Ukraine a keda demostra.
