E calidad di Salud Publico ta factor determinante pa futuro
* Horario di cita ta wordo mantene y servicio a progresa
* Pashentnan tambe cu tarea importante pa enfrenta 2023
ORANJESTAD(AAN)- Pa hopi tempo, ora Horacio Oduber Hospital bira topico di combersacion, ponencianan negativo ta yena aire.
E centro di salud di Aruba, cu mester atende cu pashentnan cu mester wordo interna pa haya cuido medico, tabata conoce problema tras problema, cu a culmina den temporada di Covid-19.
Na momento cu mundo a bati alarma pa e Pandemia, Aruba tabata den suspenso grandi debi na e ola di mal noticia cu tabata bandona e hospital, na cual Pueblo a gasta y sigui gasta placa pa edificio, pa facilidadnan cu no a bay manera Pueblo a pensa basa riba e sumanan enorme cu a wordo hinca den proyectonan.
Cu Covid-19 un momento special a bati na porta di Aruba, cu mescos cu henter mundo mester a admiti cu Salud Publico mester tin prioridad den planificacion di e pais cu mester a subi un rumbo nobo.
Sumamente alentador tabata sigur e desaroyo pariba di brug, caminda Imsan a yena un necesidad cu pa hopi tempo Aruba a sinti.
“Bo mester skirbi algo di Hospital,” ta e mensahe cu nos a ricibi di un ciudadano, cu a asina a entrega nos e tarea pa atende cu desaroyonan na Hospital.
E conclusion tabata cu e ciudadano cu a exigi atencion pa Hospital, tabata tin tur motibo pa haci esaki, manera otro informantenan cu a wordo acerca, a trece dilanti.
Pa ta honesto, den noticia generalmente e parti positivo di desaroyonan hopi bez ta sufri na man di desaroyonan negativo.
E impresion publico di Hospital a cambia y mester conclui cu e team di trahador riba tur tereno, dirigi pa Jacco Vroegop, ta haya reconocemento di parti di publico cu ta papia di cambio grandi.
Uno di e comentarionan negativo den pasado tabata, e tempo cu tabata bay perdi na ineficiencia y tambe cu e pashent tabata perde.
Ta hustamente eficencia y un bon trabou di personal di tur rango den Hospital, ta bini dilanti den comentario di publico, cu mester wordo interna pa por haya e cuido medico rekeri.
E informacionnan cu DIARIO a ricibi ta hopi importante den un tempo cu na varios forma mester observa cuido medico general y sigur e cuido cu Hospital ta brinda.
Publico lo mester bira participante den un proceso den cual Salud Publico ta bay ta central den atencion general na e pais.
Salud Publico mescos cu tur ramo den comunidad, ta enfrenta un tempo financiero di retonan grandi.
Edad di hende a sigui subi. Na mes momento, e motor di e sector di Cuido Medico ainda ta sinti e peso di Covid-19 pa cual mester keda prepara manera desaroyonan den exterior a indica.
Prijsnan ta sigui subi pa e sector aki tambe, cu den un recesion mundial cu ta wordo spera, sigur lo sinti e peso tambe.
DIARIO a splica na hopi ocasion, cu inflacion a bati na porta di Salud Publico tambe mescos cu na tur otro sector.
Publico mester asumi su responsabilidad propio tambe y realisa cu cada cent cu bay perdi, ta kita for di e resultadonan positivo cu mester alcansa.
Mescos cu publico ta encanta cu e hecho cu awor ora e yega pa un cita na hospital e no tin un tempo largo di espera, publico mester mira tambe cu tur hende tin un deber enfrente otro.
Den e cuadro aki mester yuda den baha gasto cu ta keda na tur hende. No abusa di remedi. Tene e personal cu ta traha den e sector cu ta exigi tanto di un hende, na consideracion.
Temponan dificil ta na caminda pa henter mundo y tur sector, incluyendo cuido medico.
E peso di trabou pa personal ta algo cu mundialmente ta haya atencion. Personal den cuido medico ta hende cu den situacionnan special manera tempo di Covid-19 a duna prueba di ta haci sacrificio pa sigui dilanti.
Personal na tur nivel ta duna bon servicio, manera publico ta trece dilanti, awor sostene e trabou gubernamental, di gerencia di Hospital y di trahadornan cu un actitud di responsabilidad na un momento sumamente dificil pa hende mundo cu ta enfrenta recesion y ta exigi cambio den hopi asunto cu mundo desaroya no ta duna balor y reconocemento.
