Director di RBC Royal Bank Aruba N.V, Pierre Rafini:
- Cuater miembro di prensa ta wordo reconoci
- Premio Djiespie Franken ta bay pa Joshua Bryson
ORANJESTAD (AAN) Director di RBC Royal Bank Aruba N.V, señor Pierre Rafini, a yama un conferencia di prensa, den cual a duna informacion tocante locual ta bay yama e siman aki “E cas di Leo”, na unda miembronan di prensa, conhuntamente cu señor Leo Vrolijk, lo lanza e di 19 edicion di e exposicion di potret “Lens di mi wowonan” cu ta un reconocemento na Dia di Prensa, cu ta wordo celebra Dia 1 di September.
“Pa nos di RBC ya ta hopi aña cu nos ta sostene e iniciativa aki, y asina conmemora e Dia di Prensa, y e trabao importante y impactante di miembronan di prensa y di media, aki na Aruba.
Un Dia hopi importante ta wordo conmemora pasobra prensa tin un funcion fundamental pa mantene nos comunidad bon informa, riba tur locual ta sosode riba nos Isla, y alavez tambe na mundo henter”, señor Pierre Rafini a expresa.
Rafini a señala cu e trabao di prensa no ta un trabao facil, y algun ta wordo yama cu e tarea primordial aki, cual ta boso nan! Esaki ta exigi di hopi curashi, precision, profesionalismo, y dedicacion.
“Desde e inicio di e exposicion aki RBC ta e sponsor principal di e exposicion aki. Y nos ta hopi orguyoso, di asina por contribui na nos prensa local, cu merece nos apoyo. E exposicion ta un muestra di profesionalismo, y nos ta felicita señor Leo Vrolijk, un bez mas cu e exposicion aki. E aña aki, tin un dedicacion special na cuater miembro di prensa, tambe 75 aña di Biblioteca Nacional Aruba, como tambe na Fundacion Rancho Aruba celebrando 200 aña di Oranjestad. E personanan den periodismo y fotografia cu ta wordo reconoci señora Farra Boekhoudt, señora Marianelis Berry-Ortin, y señor Hubert de Cuba. E premio di Djiespie Franken ta wordo otorga e aña aki, na señor Joshua Bryson. Un pabien na bosonan tur!” Rafini a bisa.
El a agrega di parti di RBC Royal Bank Aruba NV, nan ta spera di mira e trabao valioso cu tur miembro di prensa a bin ta haci pa añanan largo, y pa mas aña nos dilanti nos ta spera di por sigui contribui cu e bunita proyecto aki di Leo. “Un pabien na tur miembro di prensa riba nan Dia di Prensa”, Director di RBC Royal Bank a conclui.
