Durante Luna di Grandinan e cambio di e adulto mayor mester ta central - *Mundo mester haci uzo di e generacion cu ta un “data bank” di comunidad - *E adulto mayor a bay luna, a introduci computer pa jet yena espacio aereo
ORANJESTAD (AAN) — Manera Ministro Ursull Arends a anuncia, a base di Dia di Grandinan, October lo wordo uza como Luna di Adultonan Mayor.
Un paso hopi importante pasobra pa por papia di e generacion nobo di adulto mayor, mester presenta e realidad di e generacion nobo di adulto mayor.
Tin un problema pa presenta e imagen real di e adulto mayor, cu ta constructor di tempo y yabi di conocemento di e comunidad cu nan a construi despues di Segunda Guera Mundial.
E formulanan cu a cambia mundo, tabata e realidad di e generacion di adulto mayor, di grandinan di awe, cu ta uno di e generacionnan mas revolucionario cu mundo a conoce y hasta pa motibo di nan edad halto, ta haci cu mundo ta enfrenta tur tipo di problema.
E solucion pa e adulto grandi ta, pa permiti nan ta simplemente ciudadano y no marca nan pa nan edad, cu ta algo cu nan a rechasa for di e momento cu nan a basha e mundo prome cu Segunda Guera Mundial abou pa haci loke ningun hende a pensa te na e momento cu lo a pasa.
Uno di e problemanan mas grandi di e adulto mayor awe ta, cu ainda hopi kier regala grandinan un paki di buscuchi.
E grandinan di awe ta hende cu habri porta pa e nivel di bida moderno, cu Cola y potato chips y paki di pop corn pa mira pelicula.
E adulto mayor di awe ta forma parti di e generacion cu a cuminsa biaha cu avion, a cumpra e prome aparatonan di television, a baila rock y a tene protesta contra e mundo cu nan a basha abou.
E adulto mayor di awe ta e revolucionario di ayera, cu a introduci loke awe ta yama “Teenager” y a haci posibel pa hubentud por habri boca na schoolnan cu a habri porta pa nan tambe por a capacita nan mes.
Homber y muher a cuminsa capacita nan mes na Aruba of den exterior. Nan a bira e generacion nobo di trahador, di empresario y creador di discotheque.
E adulto mayor a cambia relacion humano y haci uzo di jet, di autonan cu a cuminsa yena caya, pa nan transforma mundo cu a conoce “drive in” y “drive through”.
E adulto mayor tin e secretonan di formulanan cu el a inventa den e revolucion di tecnologia, cu a wordo introduci dor di e adulto mayor di awe.
Den un mundo cu ta en busca di cantidad di contesta, e adulto mayor tin un tarea grandi.
E adulto mayor tin e conocemento basico di e tempo moderno cu el a construi y cu awe mester sigui funciona pa sirbi hende.
Esaki ta nifica cu uzo mester wordo haci di e adulto mayor, cu no mester stroba e hoben dor di ocupa cuponan di trabou pero si por wordo uza como consehero pa hunto cu hobennan, crea un mundo nobo.
E adulto mayor por splica pakico erornan a wordo comete na Aruba y na mundo y pakico cierto desaroyonan mundial a tuma lugar.
E adulto mayor por duna tur indicacion kico ta e solucion pa congestion di trafico pa e simpel motibo cu el a yuda crea trafico pega.
Pa comunidad funciona, e adulto mayor no mester ta un peso pero mester wordo uza como un “data bank” cu ta entrega informacion na hobennan cu mester sigui traha riba loke e adulto mayor a produci.
E participacion di e adulto mayor mester wordo regla na un forma cu ta duna contenido na e realidad di e adulto mayor, inventor y constructor di un mundo cu a nace ora e adulto mayor di awe a canta revolucion y a basha e mundo di ayera abou pa produci loke awe ta comunidad mundial.
